रायगड – “२६ जानेवारी १९५० ला कोणता वार होता?” किंवा “१५ ऑगस्ट २०४० कोणत्या दिवशी येईल?” असा प्रश्न विचारला तर बहुतेक जण मोबाईल किंवा कॅलेंडरची मदत घेतात. मात्र Dr. प्रशांत राघमवार यांनी असे एक भन्नाट सूत्र तयार केले आहे की, आता कोणताही वार मनातल्या मनात अवघ्या एका मिनिटात काढता येणार आहे. सुत्र पीएम श्री स्कूल जवाहर नवोदय विद्यालयचे प्राचार्य असलेल्या डॉ. राघमवार यांनी इंग्रजी कॅलेंडरवरील वार शोधण्याची अतिशय सोपी आणि जलद पद्धत विकसित केली आहे. विशेष म्हणजे ही पद्धत इतकी सहज आहे की शालेय विद्यार्थी, स्पर्धा परीक्षांची तयारी करणारे युवक तसेच सर्वसामान्य नागरिकही कोणत्याही वर्षातील कोणत्याही दिवसाचा वार क्षणार्धात सांगू शकतील.
जगभरात वार काढण्यासाठी अनेक गणिती पद्धती वापरल्या जातात. मात्र त्यातील गुंतागुंत बाजूला ठेवत डॉ. राघमवार यांनी तयार केलेले हे सूत्र “स्मार्ट कॅलेंडर ट्रिक” म्हणून चर्चेत आले आहे. त्यांच्या या संशोधनाला १४ मे २०२६ रोजी भारत सरकारच्या कॉपीराईट कायद्यांतर्गत अधिकृत मान्यता मिळाली आहे.
“गणित अवघड नाही, ते खेळासारखे सोपे असू शकते,” हे विद्यार्थ्यांना पटवून देण्याचा प्रयत्न या सूत्रामागे असल्याचे डॉ. राघमवार यांनी सांगितले. भविष्यात या पद्धतीचा समावेश शालेय पाठ्यपुस्तकात व्हावा, यासाठी शिक्षण विभागाकडे पाठपुरावा करण्यात येणार आहे.
