अहमदपूर – (बालाजी तोरणे पाटील) -स्वराज्य मित्र मंडळ संचलित स्वराज्य सार्वजनिक गणेश मंडळाच्या वतीने गुणवंत विद्यार्थ्यांचा गुणगौरव व मार्गदर्शन सोहळा उत्साहपूर्ण वातावरणात पार पडला. पत्रकार व न्यूज १८ मराठीचे प्रतिनिधी विलास बडे यांच्या प्रमुख उपस्थितीत झालेल्या या कार्यक्रमात विद्यार्थ्यांना विविध सामाजिक व शैक्षणिक विषयांवर मार्गदर्शन करण्यात आले.यावेळी बोलताना विलास बडे यांनी गणेशोत्सवाच्या माध्यमातून सामाजिक प्रबोधन आणि विधायक उपक्रमांना चालना देण्याची गरज व्यक्त केली. गणेश मंडळांची भूमिका केवळ उत्सव आयोजनापुरती मर्यादित न राहता समाजोपयोगी कार्य, जनजागृती आणि संस्कार घडविण्यातही महत्त्वाची ठरली पाहिजे, असे त्यांनी सांगितले.
भोंदूगिरी, फसवेगिरी आणि अंधश्रद्धा यापासून समाजाने सावध राहण्याबरोबरच मोबाईलच्या वाढत्या वापराचे दुष्परिणामही युवकांनी समजून घेणे आवश्यक असल्याचे त्यांनी नमूद केले. तसेच गड-किल्ल्यांचे संवर्धन, इतिहास व संस्कृतीचे जतन याकडे नव्या पिढीने गांभीर्याने पाहावे, असे आवाहन त्यांनी केले.आजच्या स्पर्धात्मक युगात युवकांनी मोबाईलच्या आहारी न जाता शिक्षण, कौशल्यविकास आणि सकारात्मक विचारसरणीला प्राधान्य द्यावे. बदलत्या काळातील आव्हानांना सामोरे जाण्यासाठी विद्यार्थ्यांनी आत्मविश्वासाने स्वतःला सक्षम करावे, असा प्रेरणादायी संदेशही विलास बडे यांनी दिला. त्यांच्या मार्गदर्शनाला उपस्थितांचा उत्स्फूर्त प्रतिसाद मिळाला. या कार्यक्रमास नगराध्यक्ष स्वप्निल व्हत्ते,. आशिष तोगरे, किलबिलचे संचालक ज्ञानोबा भोसले प्रशांत भोसले यांच्यासह स्वराज्य सार्वजनिक गणेश मंडळाचे संस्थापक अध्यक्ष संतोष मजगे, धर्मराज चावरे, मंडळाचे पदाधिकारी व कार्यकर्ते, गुणवंत विद्यार्थी आणि गणेशभक्त मोठ्या संख्येने उपस्थित होते. यावेळी गुणवंत विद्यार्थ्यांचा सत्कार करून त्यांच्या शैक्षणिक कामगिरीचे कौतुक करण्यात आले. या उपक्रमामुळे विद्यार्थ्यांना प्रोत्साहन मिळाले असून, गणेशोत्सवाच्या माध्यमातून शैक्षणिक, सामाजिक आणि जनजागृतीपर उपक्रम राबविण्याची मंडळाची भूमिका अधोरेखित झाली.
