भाग -01
चिपळूण – चिपळूणसह संपूर्ण रत्नागिरी जिल्ह्यात B LOVE नेटवर्क मार्केटिंगच्या माध्यमातून मोठ्या प्रमाणावर आर्थिक व्यवहार झाल्याचा दावा करण्यात येत असून, या व्यवहारांमध्ये सर्वसामान्य नागरिकांची मोठ्या प्रमाणावर आर्थिक फसवणूक झाल्याच्या तक्रारी समोर येत आहे. दरमहा नेटवर्कच्या माध्यमातून नियमित पैसे मिळतील, चांगले उत्पन्न मिळेल, तसेच इतरांना जोडल्यास आर्थिक फायदा होईल, अशा स्वरूपाचे आश्वासन देऊन अनेकांकडून पैसे घेण्यात आल्याचा आरोप आहे.
विशेष म्हणजे या नेटवर्कमध्ये चिपळूणपुरतेच नव्हे तर रत्नागिरी जिल्ह्यातील विविध भागांत मोठ्या संख्येने एजंट कार्यरत आहे. सामाजिक, राजकीय, शैक्षणिक क्षेत्रातील व्यक्ती तसेच विविध व्यावसायिक या नेटवर्कशी संबंधित असून, त्यांच्या माध्यमातून सर्वसामान्य नागरिकांपर्यंत या योजनेचा प्रसार झाल्याची चर्चा आहे.
या योजनेत पैसे गुंतवणाऱ्या काही नागरिकांनी नियमित उत्पन्न मिळेल, या अपेक्षेने कर्ज अथवा व्याजाने पैसे उभे करून गुंतवणूक केली आहे. सुरुवातीला काहींना परतावा मिळाल्याने योजनेवर विश्वास वाढला आणि त्यानंतर अनेकांनी आपल्या परिचितांना या नेटवर्कमध्ये जोडल्याचे सांगितले जाते. मात्र नंतर अपेक्षित पैसे मिळणे बंद झाल्याने अनेक गुंतवणूकदारांसमोर आर्थिक संकट उभे राहिल्याच्या तक्रारी आहेत. गुंतवलेली मूळ रक्कम परत मिळेल का, याबाबतही नागरिकांमध्ये संभ्रम निर्माण झाला आहे.
या संपूर्ण प्रकरणातील सर्वात गंभीर प्रश्न म्हणजे नेटवर्कमध्ये एजंट म्हणून काम करणाऱ्या काही व्यक्तींनी मोठ्या प्रमाणावर कमिशन किंवा आर्थिक फायदा मिळवला आहे. सर्वसामान्य नागरिकांनी पैसे गुंतवले, मात्र त्या बदल्यात अपेक्षित परतावा न मिळाल्याने गुंतवणूकदार आर्थिक अडचणीत आले आणि एजंट मात्र मोठ्या कमाईतून सुखाचे जीवन जगत असल्याची भावना काही गुंतवणूकदार व्यक्त करत आहेत.मात्र कोणत्या एजंटाने किती रक्कम घेतली, किती कमिशन मिळवले आणि नेमका आर्थिक व्यवहार कसा झाला, याची अधिकृत चौकशी झाल्यानंतरच वस्तुस्थिती स्पष्ट होऊ शकते.मालक परदेशात असल्याची चर्चा; प्रत्यक्ष कारभार कोणाचा?
B LOVE नेटवर्कच्या प्रमुख व्यक्तींबाबत परदेशातील, विशेषतः दुबईतील वास्तव्याची चर्चा होत आहे. त्यामुळे नेटवर्कची भारतातील कायदेशीर रचना, आर्थिक व्यवहार, कंपनीचे नोंदणी तपशील, एजंट व्यवस्था आणि गुंतवणूकदारांकडून जमा झालेल्या पैशांचा प्रवाह याची चौकशी होणे महत्त्वाचे ठरणार आहे.
चिपळूणसह रत्नागिरी जिल्ह्यात या नेटवर्कच्या माध्यमातून किती नागरिकांनी पैसे गुंतवले? एकूण किती रक्कम जमा झाली? किती जणांना परतावा मिळाला? एजंटांना किती कमिशन देण्यात आले? तसेच गुंतवणूकदारांच्या पैशांचा नेमका वापर कुठे करण्यात आला, याचा तपास करण्याची मागणी होत आहे. या प्रकरणात पैसे गुंतवलेल्या नागरिकांनी गुंतवणुकीच्या पावत्या, बँक व्यवहार, UPI व्यवहार, व्हॉट्सॲप संभाषणे, ऑडिओ-व्हिडिओ, एजंटांनी दिलेली आश्वासने, करारपत्रे आणि इतर सर्व कागदपत्रे सुरक्षित ठेवावीत. आर्थिक फसवणूक झाल्याचा संशय असल्यास संबंधित पोलीस यंत्रणा व आर्थिक गुन्हे शाखेकडे अधिकृत तक्रार दाखल करणे महत्त्वाचे ठरेल. B LOVE नेटवर्कच्या माध्यमातून रत्नागिरी जिल्ह्यात नेमके किती आर्थिक व्यवहार झाले आणि त्यामध्ये कायदेशीर नियमांचे पालन झाले का, याची संबंधित यंत्रणांनी चौकशी करण्याची मागणी आता जोर धरू लागली आहे. जबाबदार व्यक्ती आणि संबंधित एजंटांची भूमिका तपासून कायद्यानुसार कारवाई होणे आवश्यक आहे. दरमहा उत्पन्नाच्या आश्वासनावर विश्वास ठेवून पैसा गुंतवणाऱ्या सर्वसामान्य नागरिकांच्या पैशांचे काय? हा प्रश्न आता चिपळूणसह संपूर्ण रत्नागिरी जिल्ह्यात चर्चेचा विषय ठरत आहे.
