गुहागर – गुहागर तालुक्यातील निसर्गरम्य अशा हेदवी समुद्रकिनारी असलेल्या बामणघळ मध्ये पर्यटक पती-पत्नीचा बुडून मृत्यू झाल्याची दुर्दैवी घटना घडली.
निसर्गरम्य म्हणून प्रसिद्ध असलेले गुहागर तालुक्यातील हेदवी बामणघळ हे ठिकाण प्रसिद्ध आहे. नववर्षाच्या स्वागतासाठी आलेल्या पर्यटकांना या ठिकाणी भुरळ न पडली तर नवलच. त्यामुळे येथे मोठ्या प्रमाणात पर्यटकांची रेलचेल असते. याच वेळेला समुद्रकिनारी असणाऱ्या बामणघळावरील लाटेशी मौजमजा करत असताना ठाणे येथील पती-पत्नी सेल्फी काढत होते. याचवेळी आलेल्या समुद्राच्या लाटे बरोबर पत्नीचा तोल बामणळलीत गेला आणि पत्नी पडताना पाहून पतीने तिला वाचविण्याचा प्रयत्न केला असता स्वतः त्याचा तोल गेला. अशाप्रकारे या दोघांचा बामणळलीत पडून दुर्दैवी मृत्यू झाल्याची घटना घडली. अनंत माणगावकर वय 36, सूचेना माणगावकर वय 33 रा. ठाणे अशी पती-पत्नीची नावे आहेत. त्यांच्याबरोबर आई, मामेभाऊ हे चौघेजण फिरण्यासाठी ठाण्यावरून आले होते.
घटनास्थळी पोलीस पाटील स्थानिक तरुण आणि गुहागरचे पोलिस दाखल झाले असून त्या दोघांचे मृतदेह स्थानिकांच्या मदतीने काढण्यात आले. नववर्षाच्या प्रारंभीच हेदवी समुद्र किनारी या पती-पत्नी पर्यटकांचा असा दुर्दैवी मृत्यू झाल्याने फिरायला आलेल्या अनेक पर्यटकांच्या आनंदावर विरजण पडले आहे.
