गुहागर – गुहागर तालुक्याची आर्थिक राजधानी म्हणून ओळख असलेल्या आणि नव्याने निर्माण झालेल्या शृंगारतळी जिल्हा परिषद या गटाच्या आगामी ५ फेब्रुवारी २०२६ रोजी होऊ घातलेल्या निवडणुकीत मातब्बर उमेदवारांमध्ये लढत होत असल्याने या ठिकाणी कांटे की टक्कर होणार असल्याचे चित्र आहे. एकीकडे सामजसेवेचा वारसा लाभलेले कै. विष्णुपंत पवार यांचे चिरंजीव भाजप-सेना युतीचे उमेदवार आणि गुहागर तालुक्यातील गोरगरीब रुग्णांचा आधार असलेले डॉ. राजेंद्र पवार तर दुसरीकडे मनसेचे संपर्क नेते व समाज सेवेची जाण असलेले , गोरगरिबांसाठी सदैव मदतीचा हात पुढे करणारे, म्हणून ओळख असलेले मनसे शिवसेना उबाठा आघाडीतर्फे उभे असलेले प्रमोद गांधी यांचे मध्ये जोरदारपणे लढत होणार आहे.
शुंगारतळी जि. प. गटात एकूण १७५२० मतदार आहेत. यामध्ये ९३२९ महिला तर ८१९१ पुरुष मतदार आहेत. या जि. प. गटात एकूण २६ मतदान केंद्र असून या गटात शृंगारतळी पंचायत समिती तसेच तळवली पंचायत समितीचा गणाचा समावेश आहे. शृंगारतळी पंचायत समितीमध्ये ११ केंद्रात एकूण ७७१७ मतदार तर तळवली पंचायत समिती गणामध्ये १५ केंद्रात ९८०३ मतदार आहेत. शृंगारतळी पंचायत समिती गणामध्ये शृंगारतळी, जानवळे, चिखली, निगुंडळ, पाटपन्हाळे ग्रामपंचायत समावेश आहे, तर तळवली पंचायत समिती गणात तळवली, कारुळ, विसापूर, पांगारी हवेली, परचुरी, वडद, मुंढर, गिमवी, आणि झोंबडी गावांचा समावेश आहे.या जि. प. गटात दोन्ही उमेदवारांकडून जोरदार प्रचाराला सुरुवात झाली असून कोण बाजी मारणार हे ७ फेब्रुवारीलाच सिद्ध होणार आहे. या गटाच्या शृंगारतळी गणामध्ये युतीतर्फे शिवसेनेचे युवानेते गौरव वेल्हाळ तर आघाडीतर्फे शिवसेना उद्धव बाळासाहेब ठाकरे यांच्यावतीने माजी सरपंच संजय पवार निवडणुकीच्या रिंगणात आहेत. तसेच तळवली पंचायत समिती गणातून युतीतर्फे मंगेश जोशी तर आघाडीतर्फे संदिप धनावडे निवडणुकीच्या रिंगणात आहेत. एकंदरीत या जिल्हा परिषद गटामध्ये दोन्ही उमेदवार मातब्बर असल्याने आणि दोघांचेही समाज कार्यामध्ये मोलाचे योगदान असल्याने या निवडणुकीमध्ये कोण बाजी मारेल हे कुणीही सांगू शकत नाही. मात्र गावागावात, घराघरात, माणसा माणसात आपुलकीचे नाते तसेच संकटकाळी सदैव मदतीचा हात पुढे करणारे प्रमोद गांधी की ? जनतेची आरोग्य सेवा करताना कधीही ज्यांनी कोणताही आर्थिक फायदा पाहिला नाही . रुग्णसेवा हीच जनसेवा असे समजून सर्वसामान्यांमध्ये मिळून मिसळून राहिलेले डॉक्टर राजेंद्र पवार असे हे दोन्ही उमेदवार समोरासमोर उभे असल्याने मतदारांना नक्की आपलं मतदान कोणाच्या पारड्यात टाकणार हे येणाऱ्या सात तारखेला समजेल.
