संगमेश्वर – कोकणातील संगमेश्वर तालुक्यात एक मन सुन्न करणारी घटना घडली आहे. वर्गात विद्यार्थ्यांना शिकवत असतानाच एका शिक्षकाचा हृदयविकाराच्या तीव्र झटक्याने मृत्यू झाला आहे. गजानन विनायक मोघे असे या दुर्दैवी शिक्षकाचे नाव असून, त्यांच्या या आकस्मिक निधनामुळे संपूर्ण शिक्षण क्षेत्रात आणि परिसरात हळहळ व्यक्त केली जात आहे.
गजानन मोघे हे संगमेश्वर तालुक्यातील ‘जिल्हा परिषद पूर्ण प्राथमिक शाळा चाफवली क्र. १’ येथे कार्यरत होते. नेहमीप्रमाणे ते उत्साहाने वर्गात विद्यार्थ्यांना शिकवत होते. हातात खडू घेऊन फळ्यावर लिहीत असतानाच त्यांना अचानक अस्वस्थ वाटू लागले आणि चक्कर आली. ते तातडीने खुर्चीवर बसले, मात्र त्यांची प्रकृती वेगाने खालावली. हे दृश्य पाहून वर्गातील विद्यार्थी घाबरले आणि त्यांनी आरडाओरड करून शाळेतील इतर शिक्षकांना बोलावले. सहकारी शिक्षकांनी क्षणाचाही विलंब न करता त्यांना देवळे येथील डॉ. पंकज मांगलेकर यांच्या खाजगी रुग्णालयात नेले. मात्र, त्यांची परिस्थिती पाहून डॉक्टरांनी त्यांना पुढील उपचारांसाठी पाली येथील ग्रामीण रुग्णालयात हलवण्याचा सल्ला दिला. दुर्दैवाने, पाली ग्रामीण रुग्णालयात पोहोचताच वैद्यकीय अधिकाऱ्यांनी तपासणी करून त्यांना मृत घोषित केले.
‘मोघे गुरुजी’ – एक आदर्श शिक्षक आणि हरहुन्नरी व्यक्तिमत्त्व गजानन मोघे हे केवळ शिक्षकच नव्हते, तर एक अष्टपैलू व्यक्तिमत्त्व होते. माळवाडी (पो. देवळे, ता. संगमेश्वर) येथील रहिवासी असलेले मोघे गुरुजी आपल्या मितभाषी स्वभावासाठी आणि उत्कृष्ट अध्यापन कौशल्यासाठी ओळखले जात होते. त्यांच्या कार्याचा गौरव म्हणजे, त्यांच्याच मार्गदर्शनाखाली शाळेतील विद्यार्थ्यांची सलग तीन वर्षे नासा (NASA) आणि इस्रो (ISRO) च्या उपक्रमांसाठी निवड झाली होती. एक दूरदृष्टी असलेला मुख्याध्यापक म्हणून त्यांनी शाळेचा कायापालट केला होता. शिक्षण क्षेत्राव्यतिरिक्त त्यांना अभिनयाचीही आवड होती आणि ते उत्तम सूत्रसंचालक म्हणूनही परिचित होते.
