चिपळूण – चिपळूण तालुक्यातील खेर्डी एमआयडीसी परिसरात असलेल्या मालानी इम्पेरियल फर्निचर कारखान्याला बुधवारी रात्री च्या सुमारास भीषण आग लागल्याने परिसरात एकच खळबळ उडाली. काही वेळातच आगीने रौद्ररूप धारण करत संपूर्ण कारखान्याला आपल्या कवेत घेतल्याची प्राथमिक माहिती आहे.
फर्निचर व संबंधित साहित्य मोठ्या प्रमाणात असल्याने आगीचा भडका अधिकच वाढल्याचे सांगण्यात येत आहे. आगीत कारखान्यातील साहित्य, यंत्रसामग्री व इतर मालाचे मोठ्या प्रमाणात नुकसान झाल्याचा प्राथमिक अंदाज व्यक्त करण्यात येत असून, नुकसानीचा नेमका आकडा अद्याप स्पष्ट झालेला नाही. घटनेची माहिती मिळताच अग्निशमन दलाचे पथक तसेच पोलीस यंत्रणा घटनास्थळी दाखल झाली. आगीवर नियंत्रण मिळविण्यासाठी अग्निशमन दलाकडून शर्थीचे प्रयत्न सुरू करण्यात आले. आगीमुळे परिसरात धुराचे मोठे लोट पसरले होते.दरम्यान, आगीचे नेमके कारण अद्याप समोर आलेले नसून शॉर्टसर्किटसह अन्य कारणांची शक्यता तपासली जाणार आहे. आग पूर्णपणे आटोक्यात आल्यानंतर पंचनामा व तपासातून आगीचे कारण आणि प्रत्यक्ष नुकसानीची माहिती स्पष्ट होण्याची शक्यता आहे.
