चिपळूण – राज्याचे इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता तसेच सांस्कृतिक कार्य मंत्री ॲड. आशिष शेलार यांचा बुधवारी (१५ जुलै) रत्नागिरी जिल्ह्याचा दिवसभराचा दौरा होणार असून, चिपळूण, संगमेश्वर आणि रत्नागिरी येथे विकासकामांची पाहणी, सांस्कृतिक वारसा संवर्धन, कार्यकर्त्यांशी संवाद आणि विविध सामाजिक-सांस्कृतिक कार्यक्रमांना उपस्थिती असा व्यस्त कार्यक्रम निश्चित करण्यात आला आहे.
मंत्री शेलार पहाटे वंदे भारत एक्सप्रेसने दादरहून खेड येथे दाखल होणार आहेत. त्यानंतर ते चिपळूण येथील वाशिष्ठी डेअरीची पाहणी करून स्थानिक विकासकामांचा आढावा घेणार आहेत. पुढे सहकार भवनात भाजप रत्नागिरी (दक्षिण) आयोजित कार्यकर्ता मेळाव्यात ते मार्गदर्शन करणार असून, पक्षाच्या पदाधिकाऱ्यांशी संघटनात्मक चर्चा देखील होणार आहे.
दुपारनंतर मंत्री शेलार संगमेश्वर येथील छत्रपती संभाजी महाराज स्मारकाला अभिवादन करणार असून, त्यानंतर चवे-देऊड येथील ऐतिहासिक कातळशिल्पांची पाहणी करून सांस्कृतिक वारसा जतनासंदर्भात माहिती घेणार आहेत.
सायंकाळी रत्नागिरी शहरात नमन-जाखडी कलाकार संघटनांच्या सत्कार समारंभात सहभागी होत कलाकारांशी संवाद साधणार आहेत. त्यानंतर कबड्डी महर्षी स्व. शंकरराव (बुवा) साळवी यांच्या जयंतीनिमित्त आयोजित २६ व्या कबड्डी दिन कार्यक्रमाला उपस्थिती लावतील. दिवसाची सांगता स्वातंत्र्यवीर विनायक दामोदर सावरकर यांच्या जीवनावर आधारित सांगीतिक कार्यक्रमाने होणार आहे.
दिवसभर विविध शासकीय, सांस्कृतिक, क्रीडा आणि संघटनात्मक कार्यक्रमांमध्ये सहभाग घेतल्यानंतर मंत्री शेलार रात्री कोकणकन्या एक्सप्रेसने दादरकडे रवाना होणार आहेत. या दौऱ्यामुळे रत्नागिरी जिल्ह्यातील राजकीय, सांस्कृतिक आणि सामाजिक क्षेत्रात विशेष उत्सुकता निर्माण झाली असून, विविध विकासकामे, सांस्कृतिक वारसा आणि स्थानिक प्रश्नांवर मंत्री शेलार काय भूमिका मांडतात याकडे सर्वांचे लक्ष लागले आहे.
