मुंबई – लोकप्रतिनिधींनी संयम आणि सभ्यता राखण्याची अपेक्षा असताना शिवसेना (शिंदे गट) खासदार Sanjay Dina Patil यांनी पत्रकारांशी संवाद साधताना संतापाच्या भरात मर्यादा ओलांडल्याची घटना समोर आली आहे. माध्यम प्रतिनिधींनी विचारलेल्या प्रश्नामुळे चिडलेल्या पाटील यांनी पत्रकारांना अर्वाच्च भाषेत शिवीगाळ करत थेट मारहाणीची धमकी दिल्याने राजकीय वर्तुळात खळबळ उडाली आहे.
संजय राऊतांच्या आरोपांवर प्रतिक्रिया देण्यासाठी आयोजित संवादानंतर पाटील पत्रकारांच्या प्रश्नांना उत्तरे देत होते. मात्र अतिरिक्त प्रश्न विचारण्यात आल्यानंतर त्यांचा संयम सुटला. “बंद करा आता, नाहीतर मी विसरून जाईन की मी खासदार आहे,” असे म्हणत त्यांनी पत्रकारांवर अरेरावीची भाषा केली. यावेळी त्यांनी वारंवार शिवीगाळ करत, “इज्जत करतो, इज्जत करा… उगाच डोक्यात जाऊ नका,” असे म्हणत पत्रकारांना धमकावले. इतकेच नव्हे तर, “परत आला ना तर मारून पाठवणार,” अशा शब्दांत त्यांनी थेट धमकी दिल्याचा आरोप होत आहे.
घटना इथेच थांबली नाही. “रेकॉर्ड करा, लिहा, कमिशनरकडे तक्रार करा,” असे आव्हानात्मक वक्तव्य करत त्यांनी आपली भूमिका अधिक आक्रमक केली. पत्रकारांनी शांतता राखण्याचा प्रयत्न केला तरी पाटील यांचा संताप कायम राहिल्याचे उपस्थितांनी सांगितले.
या प्रकारामुळे पत्रकार संघटनांमध्ये संतापाची लाट उसळली असून लोकशाहीच्या चौथ्या स्तंभावरच दबाव टाकण्याचा हा प्रयत्न असल्याची टीका होत आहे. विरोधी पक्षांनीही या घटनेचा निषेध करत खासदारांवर कारवाईची मागणी केली आहे.लोकप्रतिनिधीकडून पत्रकारांना धमकी देण्याची ही घटना लोकशाही मूल्यांवर प्रश्नचिन्ह निर्माण करणारी ठरत असून, यावर आता संबंधित पक्ष आणि सरकारची भूमिका काय असणार याकडे सर्वांचे लक्ष लागले आहे.
