दापोली -दापोली तालुक्यातील श्री गोपाळकृष्ण ग्रामीण बिगरशेती सहकारी पतसंस्थेत तब्बल २ कोटी ६९ लाख ५० हजार रुपयांचा आर्थिक गैरव्यवहार झाल्याचा धक्कादायक प्रकार समोर आला आहे. या प्रकरणी पतसंस्थेचे पदाधिकारी, संचालक, व्यवस्थापक व कर्मचाऱ्यांसह १३ जणांविरोधात दापोली पोलिस ठाण्यात गुन्हा दाखल करण्यात आला आहे. सहकार विभागाच्या कारवाईमुळे दापोलीतील सहकार क्षेत्रात मोठी खळबळ उडाली आहे.
जिल्हा उपनिबंधक (सहकारी संस्था) यांच्याकडे पतसंस्थेच्या संचालक मंडळाविरोधात तक्रार दाखल झाल्यानंतर या प्रकरणाची चौकशी करण्यासाठी विशेष लेखापरीक्षकांची नियुक्ती करण्यात आली होती. त्यानंतर सन २०१८-१९ ते २०२२-२३ या कालावधीतील संस्थेच्या व्यवहारांचे सखोल लेखापरीक्षण करण्यात आले.
या तपासणीत अनेक गंभीर अनियमितता समोर आल्याचे सांगण्यात आले आहे. संस्थेच्या काही पदाधिकाऱ्यांनी संगनमत करून खोटी व बनावट कागदपत्रे तयार केली. त्याआधारे कर्जप्रकरणे मंजूर करून संस्थेच्या निधीचा गैरवापर केल्याचा आरोप आहे. विशेष म्हणजे, संस्थेच्या उपविधीतील नियमांचे उल्लंघन करून कर्ज मंजूर करण्यात आल्याचेही लेखापरीक्षणात आढळले. काही प्रकरणांमध्ये आवश्यक कागदपत्रांची पूर्तता नसतानाही कर्जवाटप करण्यात आल्याचा ठपका ठेवण्यात आला आहे. या प्रकरणात सहकार विभागाच्या आदेशानंतर दापोली पोलिसांत गुन्हा दाखल करण्यात आला. संबंधित प्रकरणाची चौकशी वरिष्ठ पोलिस निरीक्षक महेश तोरस्कर यांच्या मार्गदर्शनाखाली सुरू असून, पुढील तपासासाठी हे प्रकरण रत्नागिरी येथील आर्थिक गुन्हे शाखेकडे सोपविण्यात येणार असल्याचे सांगण्यात आले आहे. या प्रकरणातील आरोपींमध्ये संस्थेचे अध्यक्ष, उपाध्यक्ष, संचालक, व्यवस्थापक आणि संबंधित कर्मचारी यांचा समावेश आहे.
पतसंस्थेतील हा कथित गैरव्यवहार समोर आल्यानंतर सभासदांच्या ठेवी आणि संस्थेच्या आर्थिक व्यवहारांच्या पारदर्शकतेबाबत गंभीर प्रश्न उपस्थित झाले आहेत. संस्थेच्या कारभारात झालेल्या कथित अनियमिततेची सखोल चौकशी करून दोषींवर कठोर कारवाई करावी, अशी मागणी सभासदांकडून होण्याची शक्यता आहे.
या प्रकरणामुळे सहकारी संस्थांच्या कारभारावर देखरेख ठेवणाऱ्या यंत्रणांच्या कार्यक्षमतेवरही प्रश्नचिन्ह निर्माण झाले असून, संपूर्ण प्रकरणाच्या तपासाकडे दापोलीसह रत्नागिरी जिल्ह्याचे लक्ष लागले आहे.
