अहमदपूर – (बालाजी तोरणे पाटील) : अहमदपूर शहरात घडलेल्या घरफोडीच्या गुन्ह्याचा अवघ्या १३ दिवसांत छडा लावत स्थानिक गुन्हे शोध (डीबी) पथकाने एका अट्टल चोराला जेरबंद करण्यात यश मिळवले आहे. गुप्त बातमीदारांकडून मिळालेली माहिती, तांत्रिक तपास आणि पोलिसांच्या अचूक नियोजनामुळे आरोपीला अटक करण्यात आली असून, चोरीतील बहुतांश मुद्देमालही हस्तगत करण्यात आला आहे. या कारवाईमुळे अहमदपूर पोलिसांच्या तपास कौशल्याचे पुन्हा एकदा दर्शन घडले आहे.
पोलिसांनी दिलेल्या माहितीनुसार, आकाश दीपकराव डहाळे यांनी अहमदपूर पोलीस ठाण्यात फिर्याद दाखल केली होती. त्यानुसार, १० जुलै २०२६ रोजी रात्री ११.०० ते ११ जुलै २०२६ रोजी पहाटे ३.०० वाजण्याच्या दरम्यान अज्ञात चोरट्याने त्यांच्या घरात प्रवेश करून कपाटाचे लॉक तोडले. त्यानंतर अडीच तोळ्याचे जुने वापरते चांदीचे ब्रेसलेट, लहान मुलाच्या हातातील एक ग्रॅम वजनाची सोन्याची मनगटी, ₹१,००० रोख रक्कम आणि तीन मोबाईल फोन, असा ₹४२,२५० किमतीचा ऐवज चोरून नेला. या प्रकरणी अहमदपूर पोलीस ठाण्यात गुन्हा दाखल करण्यात आला. गुन्ह्याचे गांभीर्य लक्षात घेऊन वरिष्ठ अधिकाऱ्यांच्या मार्गदर्शनाखाली डीबी पथकाने तपासाची चक्रे वेगाने फिरवली.
तपासादरम्यान गुप्त बातमीदाराकडून मिळालेल्या खात्रीशीर माहितीच्या आधारे पोलिसांनी सापळा रचत समीर अहमद अली सय्यद (वय २५, रा. बिस्ती गल्ली, अहमदपूर) याला २४ जुलै रोजी ताब्यात घेतले. न्यायालयाने त्याला दोन दिवसांची पोलीस कोठडी सुनावली. पोलीस कोठडीत झालेल्या कसून चौकशीत आरोपीने घरफोडीची कबुली दिली. त्यानंतर त्याच्याकडून चोरीतील बहुतांश मुद्देमाल जप्त करण्यात आला.
ही कारवाई लातूर जिल्ह्याचे पोलीस अधीक्षक अमोल तांबे, अप्पर पोलीस अधीक्षक मंगेश चव्हाण, उपविभागीय पोलीस अधिकारी (अहमदपूर) अरविंद रायबोले यांच्या मार्गदर्शनाखाली पार पडली. पोलीस निरीक्षक विनोद मेत्रेवार यांच्या नेतृत्वाखाली डीबी पथकाचे प्रमुख पोलीस हवालदार तानाजी आरदवाड, पोलीस कॉन्स्टेबल दत्तात्रय इंद्राळे, विशाल सारोळे, हरी कांबळवाड, राष्ट्रपाल कांबळे, गणेश चव्हाण, बबन चपडे, सुकेश केंद्रे, शरद गाडे आणि हनुमंत आरदवाड यांनी ही यशस्वी कारवाई केली.
