चिपळूण – कोकणातील दुग्ध व्यवसायाला नवी दिशा देणाऱ्या पिंपळी येथील वाशिष्ठी मिल्क ॲण्ड मिल्क प्रॉडक्ट्स प्रा. लि. या आधुनिक दुग्धप्रकल्पाला राज्याचे सांस्कृतिक कार्य मंत्री ॲड. आशिष शेलार यांनी आज सदिच्छा भेट देत प्रकल्पाची सविस्तर पाहणी केली. प्रकल्पाची उभारणी, आधुनिक व्यवस्थापन आणि दर्जेदार दुग्धजन्य उत्पादनांची माहिती घेत त्यांनी वाशिष्ठी डेअरीचे चेअरमन प्रशांत यादव यांचे विशेष कौतुक करत, “कोकणात असा यशस्वी डेअरी प्रकल्प उभारणे ही उल्लेखनीय कामगिरी आहे,” असे म्हणत त्यांच्या पाठीवर कौतुकाची थाप दिली.
आशिष शेलार यांच्या आगमनावेळी उत्साहाचे वातावरण निर्माण झाले होते. पूर्ण नागरी सहकारी पतसंस्थेच्या ज्येष्ठ संचालिका सौ. स्मिता चव्हाण यांनी पारंपरिक औक्षण करून त्यांचे स्वागत केले. यावेळी फटाक्यांची आतषबाजी करण्यात आली आणि परिसर जल्लोषात दुमदुमून गेला. यानंतर वाशिष्ठी डेअरीचे चेअरमन प्रशांत यादव तसेच वाशिष्ठी डेअरीच्या मुख्य प्रवर्तक आणि चिपळूण नागरी सहकारी पतसंस्थेच्या मुख्य कार्यकारी अधिकारी सौ. स्वप्ना यादव यांनी वाशिष्ठी परिवाराच्या वतीने मंत्री आशिष शेलार यांचा शाल, श्रीफळ व स्मृतिचिन्ह देऊन सत्कार केला.
प्रकल्पाची पाहणी करताना मंत्री शेलार यांनी दूध संकलन, प्रक्रिया, पॅकेजिंग आणि विविध दुग्धजन्य उत्पादनांच्या निर्मितीची माहिती जाणून घेतली. उत्पादनांचा दर्जा, स्वच्छता, आधुनिक तंत्रज्ञानाचा वापर आणि व्यवस्थापनाची त्यांनी प्रशंसा केली. ग्रामीण भागातील शेतकऱ्यांना रोजगार व आर्थिक बळ देणारा हा प्रकल्प कोकणासाठी प्रेरणादायी असल्याचे त्यांनी नमूद केले. यावेळी आमदार प्रमोद जठार, भाजपचे प्रदेश उपाध्यक्ष अतुल काळसेकर, महाराष्ट्र राज्य सहकारी पतसंस्था फेडरेशनचे अध्यक्ष ॲड. दीपक पटवर्धन, चिपळूण नागरी सहकारी पतसंस्थेच्या तज्ज्ञ संचालिका ॲड. नयना पवार, वाशिष्ठी डेअरीचे संचालक महेश खेतले, प्रशांत वाजे, अविनाश गुडेकर, वाशिष्ठी डेअरीचे जनरल मॅनेजर लक्ष्मण खरात, तसेच वाशिष्ठी डेअरीचे अधिकारी-कर्मचारी, चिपळूण तालुका वकील संघाचे पदाधिकारी व सदस्य, भाजपचे पदाधिकारी, कार्यकर्ते आणि स्थानिक लोकप्रतिनिधी मोठ्या संख्येने उपस्थित होते.
