चिपळूण – सामाजिक बांधिलकी आणि मानवतेचा सुंदर संदेश देत डीबीजे महाविद्यालय, चिपळूण येथे कॉम्प्युटर सायन्स विषयाची पदवी शिक्षण घेणाऱ्या २२ वर्षीय वेदांत कदम या विद्यार्थ्याने आपले पहिले रक्तदान करून कॅन्सरग्रस्त रुग्णाला मोलाची मदत केली आहे. त्याच्या या प्रेरणादायी कार्याचे सर्व स्तरांतून कौतुक होत आहे.
वेंगुर्ला, सिंधुदुर्ग येथील कॅन्सरग्रस्त रुग्ण तुळसकर यांना तातडीने B Positive रक्तगटाच्या रक्ताची आवश्यकता असल्याची माहिती मिळताच वेदांत कदम यांनी कोणतीही विलंब न लावता तत्काळ प्रतिसाद दिला. त्यांनी वालावलकर हॉस्पिटल, डेरवण येथे जाऊन आपले पहिले आणि अमूल्य रक्तदान केले. त्यांच्या या कृतीमुळे रुग्णाला वेळेत रक्त उपलब्ध होऊन मोठा दिलासा मिळाला.
विद्यार्थीदशेत असतानाच समाजाप्रती असलेली संवेदनशीलता, कर्तव्यभावना आणि सेवाभाव वेदांत यांच्या कृतीतून अधोरेखित झाला आहे. आजच्या स्पर्धेच्या युगात स्वतःच्या व्यस्त दिनक्रमातून वेळ काढून गरजू व्यक्तीसाठी पुढे येणे, ही बाब इतर तरुणांसाठी प्रेरणादायी ठरत आहे. रक्तदान हे सर्वोत्तम दान मानले जाते. एका रक्तदात्यामुळे अनेकांचे प्राण वाचू शकतात. वेदांत कदम यांच्या या उदात्त कार्यामुळे तरुणाईसमोर एक सकारात्मक आदर्श निर्माण झाला असून, समाजात रक्तदानाबाबत जनजागृती होण्यासही मदत होणार आहे. सिंधुरक्तमित्र प्रतिष्ठान यांनी वेदांत कदम यांच्या कार्याचे अभिनंदन करत, अधिकाधिक युवक-युवतींनी नियमित रक्तदानासाठी पुढे यावे आणि गरजू रुग्णांच्या जीवनरक्षणासाठी हातभार लावावा, असे आवाहन केले आहे.
