खेड- खेड-दापोली मार्गावरील साखरोळी परिसरात रविवारी सायंकाळी मानवी हाडांचा सांगाडा आढळून आल्याने परिसरात एकच खळबळ उडाली आहे. या धक्कादायक घटनेची माहिती मिळताच खेड पोलिसांनी घटनास्थळी धाव घेत पंचनामा करून तपासाची चक्रे वेगाने फिरवली आहेत.
प्राथमिक माहितीनुसार, साखरोळी येथील निर्जन भागात काही नागरिकांना मानवी हाडे व सांगाड्यासदृश अवशेष दिसून आले. याची माहिती तात्काळ पोलिसांना देण्यात आली. पोलिसांनी घटनास्थळी पोहोचून परिसराची पाहणी करत सांगाडा ताब्यात घेतला.सापडलेला हाडांचा सांगाडा पुढील वैद्यकीय आणि न्यायवैद्यक तपासणीसाठी कळंबणी उपजिल्हा रुग्णालयात पाठविण्यात आला असल्याची माहिती खात्रीशीर सूत्रांकडून मिळाली आहे. दरम्यान, हा सांगाडा पुरुषाचा आहे की महिलेचा, तसेच तो किती दिवसांपूर्वीचा आहे याबाबत अद्याप कोणतीही अधिकृत माहिती समोर आलेली नाही. त्यामुळे या प्रकरणाचे गूढ अधिकच वाढले असून विविध शक्यतांच्या अनुषंगाने खेड पोलीस तपास करत आहेत. या घटनेमुळे साखरोळी परिसरात चर्चांना उधाण आले असून सांगाड्याची ओळख पटविणे आणि त्यामागील नेमके कारण शोधणे हे पोलिसांसमोर मोठे आव्हान ठरणार आहे.
