चिपळूण – चिपळूण तालुक्यातील कामथे उपजिल्हा रुग्णालयातील वैद्यकीय अधिकारी डॉ. कांचन शिरीष मदार यांच्यावरील लाचलुचपत प्रकरणात आरोग्य विभागाने कठोर भूमिका घेत त्यांना निलंबित केले आहे. गर्भपातासाठी आवश्यक औषधांचे किट उपलब्ध करून देण्यासाठी ४ हजार ५०० रुपयांची लाच स्वीकारल्याचा आरोप त्यांच्यावर असून, लाचलुचपत प्रतिबंधक विभागाच्या (एसीबी) कारवाईनंतर ही प्रशासकीय कारवाई करण्यात आली.
डॉ. मदार या वर्ग-२ (अ गट) वैद्यकीय अधिकारी म्हणून कार्यरत होत्या. एसीबीने कारवाई केल्यानंतर जिल्हा रुग्णालय प्रशासनाने त्यांच्याविरुद्ध निलंबनाचा प्रस्ताव आरोग्य उपसंचालकांकडे सादर केला होता. प्रस्तावाचा विचार करून संबंधित अधिकाऱ्यांनी निलंबनाचे आदेश जारी केले. ३ जून रोजी एसीबीच्या पथकाने कामथे उपजिल्हा रुग्णालय परिसरात सापळा रचला होता. तक्रारदार महिलेने केलेल्या तक्रारीनुसार, गर्भपातासाठी आवश्यक औषधांचे किट देण्यासाठी ४ हजार ५०० रुपयांची मागणी करण्यात आली होती. तक्रारीची पडताळणी केल्यानंतर सापळा रचण्यात आला आणि तक्रारदाराकडून लाचेची रक्कम स्वीकारल्याचा आरोप करत डॉ. मदार यांना पंचांसमक्ष ताब्यात घेण्यात आले. या प्रकरणी चिपळूण पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला असून तपास सुरू आहे. दरम्यान, प्रशासकीय शिस्त आणि सेवेची प्रतिमा कायम राखण्यासाठी आरोग्य विभागाने निलंबनाची कारवाई केल्याचे समोर आले आहे.
