ठाणे – राज्यातील अनेक नागरिकांसह व्यापारी ,राजकारणी, सत्तेतील मंत्री-आमदार आणि प्रशासनातील आयएएस, आयपीएस अधिकाऱ्यांना कोट्यवधी रुपयांचा चुना लावून महाराष्ट्राबाहेर धूम ठोकलेल्या TWJ कंपनीचा मालक आणि व्यवस्थापकीय संचालक समीर नार्वेकर, त्याची पत्नी नेहा नार्वेकर आणि संचालक अमीत बालम या तिघांना ठाणे पोलिसांच्या आर्थिक गुन्हे शाखेने शुक्रवारी बेड्या ठोकल्या.
पोलिस आणि अनेकांची फसवणूक करून पळालेल्या आणि पोलिसांच्या नजरेत न येणाऱ्या समीर नार्वेकर आणि त्याच्या पत्नीच्या मुसक्या आवळण्यात ठाणे पोलिसांच्या आर्थिक गुन्हे शाखेला यश आले आहे. राज्यभरातील आठ जिल्ह्यांतून पोलिसांकडे समीर नार्वेकरच्या विरोधात प्रचंड तक्रारी आल्या होत्या. तो पोलिसांच्या हाती लागत नव्हता. त्यावरून पोलिसांकडे बोट दाखवले जात होते. ठाणे पोलिसांवरही समीर नार्वेकरला पाठीशी घालत असल्याचा आरोप करण्यात आला होता. या प्रकरणातील तपास अधिकारी माधवी राजेकुंभार आणि त्यांच्या टीमने आठवडाभर गुजरातमध्ये तळ ठोकून या प्रकरणातील आरोपी समीर नार्वेकर, त्याची पत्नी यांच्यासह तिघांना ताब्यात घेतले आहे. अधिक तपास पोलीस करत आहेत.
