गुहागर – ओटीटी प्लॅटफॉर्मवरील ‘देवखेळ’ वेबसीरीजच्या टीझरमधून संकासुराबाबत अपमानकारक व धार्मिक भावना दुखावणारा मजकूर प्रसारित केल्याबाबत गुहागर तालुक्यातून संतप्त प्रतिक्रिया उमटल्या आहेत. यामुळे संबंधित चॅनलवर कारवाई करण्यात यावी तसेच निर्मात्याने संबंधित मजकूर बदलून माफी मागावी, अशा मागणीचे निवेदनं गुहागर तालुकावासियांच्या वतीने गुहागर पोलीस ठाण्यामध्ये देण्यात आले आहे.
संकासूर हा गुहागर परिसरातील प्राचीन व श्रद्धास्थान असलेला देव असून शिमगोत्सवामध्ये हजारो भाविक त्याची श्रद्धेने उपासना करतात. संकासूराबाबत भाविक वर्गात अत्यंत आदर व धार्मिक भावना आहेत. देवखेळ वेब सिरीज ३० जानेवारी रोजी प्रदर्शित होणार आहे. त्याचा टीझर सध्या सोशल मिडियावर व्हायरल झाला आहे. या टीझरमध्ये संकासूर देवाबाबत बदनामीकारक, अपमानकारक व देवत्वाबाबत संभ्रम निर्माण करणारे संवाद दाखवण्यात आले आहेत. विशेषतः संकासूर शिक्षा करतो. बळी घेतो, असे संवाद कलाकारांच्या तोंडी देण्यात आले आहेत. बदनामीकारक वाक्ये जाणीवपूर्वक प्रसारित करण्यात आलेली आहेत. त्यामुळे आमच्या धार्मिक भावना दुखावल्या गेल्या आहेत. यामुळे समाजात असंतोष निर्माण झाला आहे. वेब सिरीजचे निर्माता-दिग्दर्शक चंद्रकांत लता गायकवाड यांच्या विरुद्ध गुन्हा दाखल करण्यात यावा आणि त्या ट्रेलरचा व्हिडिओ ताबडतोब थांबवण्यात यावा अशी करण्यात आली. यावेळी अॅड. संकेत साळवी, सोहम सातार्डेकर, अरुण परचुरे, जगन्नाथ शिंदे, वैभव आदवडे, अमोल जामसुतकर, अमित कुबडे, सुहास सातार्डेकर, रोहन भोसले, संदीप भोसले, विलास कांबळे, पराग मालप यांच्यासह तालुक्यातील अनेक ग्रामस्थ उपस्थित होते. तसेच सायंकाळी शहरातील श्री महापुरुष मंदिरामध्ये तालुक्यातील नमन मंडळातील सर्व सदस्यांना बोलावून बैठक पार पडली व या घटनेचा सर्वानुमते निषेध नोंदवण्यात आला.
