पाठीचे व्यायाम करा
पूर्वीच्या काळी सुविधांच्या अभावामुळे शरीराला चांगला व्यायाम होत असे. आता मात्र अनेकांचा वेळ एकाच जागी बसून कामं करण्यात जातो. शारीरिक हालचालींच्या कमतरतेमुळे आपले स्नायू, हाडं, लिगामेंट्स आणि टिश्यू कमजोर होतात. बसून काम करणाऱ्यांनी मणक्याची विशेष काळजी घेणं गरजेचं आहे.
बसण्याची स्थिती
काम करताना बसण्याची चुकीची सवय हे पाठदुखीचं मुख्य कारण असतं. बसताना आपली पाठ नेहमी सरळ असली पाहिजे, वाकून बसू नये, अचानक वळणं किंवा वाकणं हे प्रकार टाळायला हवे.
अधूनमधून ब्रेक घ्या
कितीही महत्त्वाचं काम असलं तरी दोन तासांपेक्षा अधिक काळ एकाच ठिकाणी बसून राहणं टाळा. खुर्चीवरून उठून आजूबाजूला थोडी चक्कर मारून या. प्रवासादरम्यानसुद्धा या गोष्टीकडे विशेषत्वानं लक्ष द्या. त्यामुळे पाठीवरचा ताण कमी होतो आणि स्नायूंना आराम मिळतो.
गुडघ्यांची हालचालही महत्त्वाची
अधिक काळपर्यंत एकाच ठिकाणी बसल्यामुळे पायांमध्येही वेदना होतात. हे टाळण्यासाठी थोड्या थोड्या वेळानं गुडघे आणि घोटे हलवत राहा. यामुळे पाय आणि मांड्यांच्या स्नायूंवरील ताण कमी होतो.
अधिक वजन उचलू नका
दैनंदिन जीवनात फारशी अंगमेहनतीची कामे करत नसाल तर अचानक अधिक वजन उचलू नका. लांबचा प्रवास केल्यानंतर वजनदार बॅग उचलण्याचा प्रयत्न करू नका. एकदम वजनी सामान उचललं तर स्नायूंना दुखापत होण्याची शक्यता अस‌ते.
पाणी प्या
प्रवासादरम्यान अडचण होऊ नये यासाठी आपण फारच कमी पाणी पितो. पाणी कमी प्यायल्याने मणका आणि शरीराच्या सांध्यांमधील पाणीही कमी होते. यातून त्या ठिकाणी वेदना होऊ शकतात.
शरीराचे बलस्थान
आपल्या शरीराचा सर्वाधिक भार कंबर आणि मणक्याच्या खालच्या भागावर पडतो. वळताना, खाली वाकताना किंवा वजनदार वस्तू उचलताना सर्वाधिक ताण याच भागवर पडतो. बसलेलो असतानासुद्धा कंबरेवरच अधिक दबाव पडतो. यामुळे वारंवार ‘स्ट्रेस इंज्युरी’ होते. जे लोक न हलता एकाच जागी बसून काम करतात त्यांनासुद्धा कंबरेच्या भागात होणाऱ्या स्ट्रेस इंज्युरीचा धोका संभवतो. हे टाळण्यासाठी काम करत असताना पाठीच्या पेशींना आराम देणं गरजेचं असतं.
