मार्गताम्हाणे -चिपळूण–गुहागर रोडवरील धोकादायक खड्ड्यांमुळे वाहनचालक व प्रवाशांना मोठ्या त्रासाला सामोरे जावे लागत असताना नवतरुण मित्र मंडळ, घोणसरेच्या वतीने सामाजिक बांधिलकी जपत खड्डे बुजवण्याचा पुढाकार घेण्यात आला. काही दिवसापूर्वी मंडळाच्या सदस्यांनी व मित्रांनी मिळून या मार्गावरील काही धोकादायक खड्डे बुजवले. नागरिकांकडून या उपक्रमाला चांगला प्रतिसाद मिळाल्यानंतर आज पुन्हा एकदा अधिक जोमाने पुढाकार घेत चिपळूण–गुहागर रोडवरील खड्डे बुजवण्याचे काम हाती घेण्यात आले.
विशेष म्हणजे, चिपळूण–गुहागर हायवेवरील खड्डे बुजवण्यासाठी तब्बल ९ कोटींचा निधी मंजूर झाल्याचे सांगितले जात आहे. मात्र निधी मंजूर होऊनही प्रत्यक्ष रस्त्यावरील खड्डे कायम असतील, तर नागरिकांनी अजून किती दिवस प्रतीक्षा करायची, असा सवाल या निमित्ताने उपस्थित करण्यात आला आहे. दररोज या मार्गावरून हजारो नागरिक प्रवास करतात. रस्त्यावरील मोठ्या खड्ड्यांमुळे अपघाताचा धोका निर्माण झाला असून, अपघात झाल्यानंतर उपाययोजना करण्यापेक्षा अपघात होण्यापूर्वीच खड्डे बुजवणे आवश्यक आहे, अशी भूमिका नवतरुण मित्र मंडळाने घेतली. या सामाजिक उपक्रमात मित्रांनीही खंबीरपणे साथ दिली. काहींनी प्रत्यक्ष श्रमदान केले, तर काहींनी आर्थिक मदत करून या कामाला बळ दिले. हा सामाजिक उपक्रम राबवत असताना रत्नागिरी हायवे पोलिसांकडून अडचणीचा सामना करावा लागला, असा दावा मंडळाच्या वतीने करण्यात आला आहे. आमच्याकडे पैशांची मागणी करण्यात आली आणि पैसे न दिल्यास आमच्यावर केस करण्याची चर्चा झाली, असा आमचा अनुभव असल्याचे मंडळाच्या वतीने सांगण्यात आले.
“रस्त्याच्या दुरुस्तीसाठी कोट्यवधी रुपयांचा निधी मंजूर झाला आहे, तर प्रत्यक्ष काम कधी सुरू होणार?” असा थेट सवाल नवतरुण मित्र मंडळाने उपस्थित केला आहे.
