गुहागर – निसर्गरम्य समुद्रकिनारा, हिरवाई आणि सुरूच्या झाडांची रांग ही गुहागरच्या किनारपट्टीची ओळख आहे. मात्र याच समुद्रकिनारी सुरूची झाडे तोडली जात असल्याचा प्रकार समोर येत असून, या झाडांची तोड नेमकी कोणाच्या परवानगीने होत आहे, असा सवाल पर्यावरणप्रेमी आणि स्थानिक नागरिकांकडून उपस्थित केला जात आहे.
समुद्रकिनारी परिसराला पर्यावरणीयदृष्ट्या विशेष महत्त्व असताना सुरूच्या झाडांची अशा प्रकारे तोड होत असेल, तर संबंधित यंत्रणांकडून याची दखल का घेतली जात नाही? सीआरझेडच्या नियमांचा अंमल असताना समुद्रकिनारी सुरूची झाडे तोडण्यास परवानगी आहे का? असा प्रश्नही नागरिकांकडून उपस्थित केला जात आहे.
समुद्रकिनाऱ्यावर सुरूची झाडे तोडली जात असतील, तर त्यासाठी संबंधित विभागाची परवानगी घेण्यात आली आहे का? झाडे तोडण्यामागील कारण काय आहे? कोणत्या जागेतील किती झाडे तोडण्यात आली? याबाबत संबंधित प्रशासनाकडे कोणती नोंद आहे का? या सर्व प्रश्नांची उत्तरे नागरिकांना मिळणे आवश्यक आहे.
विशेष म्हणजे, पर्यावरणाचे रक्षण करण्याची जबाबदारी असलेल्या यंत्रणांच्या नजरेसमोर हा प्रकार घडत असेल, तर त्याकडे जाणूनबुजून दुर्लक्ष केले जात आहे का? अशी चर्चा स्थानिक नागरिकांमध्ये सुरू आहे.
गुहागरच्या समुद्रकिनाऱ्याचे नैसर्गिक सौंदर्य आणि पर्यावरणीय महत्त्व लक्षात घेता, सुरूच्या झाडांची तोड होत असल्याच्या तक्रारींची तातडीने पाहणी करावी. संबंधित ठिकाणी प्रत्यक्ष पंचनामा करून झाडे तोडण्यास परवानगी होती की नाही, याची चौकशी करावी आणि नियमांचे उल्लंघन आढळल्यास संबंधितांवर नियमानुसार कारवाई करावी, अशी मागणी नागरिकांकडून होत आहे.
गुहागर नगरपालिका, वन विभाग, महसूल प्रशासन तसेच संबंधित सीआरझेड प्राधिकरण याप्रकरणी नेमकी काय भूमिका घेणार? समुद्रकिनाऱ्यावरील सुरूच्या झाडांची तोड थांबविण्यासाठी कोणती कारवाई केली जाणार? याकडे आता नागरिकांचे लक्ष लागले आहे.
