शृंगारतळी – गुहागर तालुक्यातील शृंगारतळी परिसरातील एका बचतगटाच्या आर्थिक व्यवहाराबाबत माहिती व हिशेबाची विचारणा केल्याच्या कारणावरून एका महिलेला घरात जाऊन शिवीगाळ व धमकी दिल्याची घटना समोर आली असून, या प्रकरणामुळे परिसरातील बचतगटांच्या कामकाजावर प्रश्नचिन्ह निर्माण झाले आहे. या घटनेची तक्रार शलाका काष्टे यांनी गुहागर पोलीस ठाण्यात दिली असून, परिसरात या प्रकरणाची जोरदार चर्चा सुरू आहे.
शृंगारतळी येथील वैशाली चव्हाण यांनी शलाका काष्टे यांच्या घरी जाऊन त्यांच्याशी उद्धटपणे वर्तन करत शिवीगाळ केली. तसेच, “यापुढे बचतगटाच्या व्यवहाराबाबत किंवा हिशेबाबाबत कोणतीही विचारणा केली, तर त्याचे गंभीर परिणाम भोगावे लागतील,” अशी धमकी दिल्याचा आरोप तक्रारीत करण्यात आला आहे.
या घटनेनंतर बचतगटांच्या आर्थिक व्यवहारातील पारदर्शकतेचा मुद्दा पुन्हा एकदा ऐरणीवर आला आहे. शृंगारतळी परिसरातील काही बचतगटांमधून कमी व्याजदराने मोठ्या प्रमाणावर रक्कम काढून ती बाजारात तब्बल पाच टक्के व्याजदराने फिरविली जात असल्याची चर्चा गेल्या अनेक दिवसांपासून सुरू आहे. या व्यवहारांबाबत काही सदस्यांकडून माहिती व हिशेबाची मागणी होत असताना, त्यातूनच हा वाद निर्माण झाल्याची चर्चा स्थानिक स्तरावर रंगली आहे.
बचतगट हे महिलांच्या आर्थिक सक्षमीकरणासाठी आणि परस्पर विश्वासावर उभे असलेले माध्यम मानले जाते. मात्र, आर्थिक व्यवहारांबाबत पारदर्शकता नसल्याच्या तक्रारी आणि त्यातून निर्माण होणारे वाद यामुळे बचतगटांच्या विश्वासार्हतेवर परिणाम होण्याची भीती व्यक्त केली जात आहे.या प्रकरणी गुहागर पोलीस ठाण्यात तक्रार दाखल करण्यात आली असून, पोलिसांकडून घटनेची चौकशी सुरू आहे. चौकशीनंतरच संपूर्ण प्रकाराचे वास्तव स्पष्ट होणार आहे.
