गुहागर – शिक्षणतज्ज्ञ सोनम वांगचुक आणि अभिजीत दीपके यांना दिल्लीतील आंदोलनादरम्यान अटक केल्याच्या निषेधार्थ गुहागर तालुका युवासेनेने आज शृंगारतळी येथे जोरदार आंदोलन छेडले. घोषणाबाजी, निषेध मोर्चा आणि सह्यांची मोहीम अशा विविध माध्यमांतून केंद्र सरकारच्या भूमिकेचा तीव्र निषेध करण्यात आला.
शृंगारतळी हायस्कूलच्या प्रवेशद्वारासमोर युवासैनिक, शिवसैनिक, विद्यार्थी आणि नागरिक मोठ्या संख्येने एकत्र आले. “विद्यार्थ्यांवर दडपशाही करणाऱ्या सरकारचा निषेध असो”, “छत्रपती शिवाजी महाराज की जय”, “भारतरत्न डॉ. बाबासाहेब आंबेडकरांचा विजय असो”, “हिंदुहृदयसम्राट बाळासाहेब ठाकरे अमर राहो” अशा घोषणांनी परिसर दणाणून गेला. या मोर्चानंतर केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीसाठी सह्यांची मोहीम राबविण्यात आली. या मोहिमेला विद्यार्थी, युवक आणि नागरिकांनी उत्स्फूर्त प्रतिसाद देत मोठ्या संख्येने सह्या करून सोनम वांगचुक यांच्या आंदोलनाला पाठिंबा दर्शविला. यावेळी युवासेनेच्या पदाधिकाऱ्यांनी प्रसारमाध्यमांशी संवाद साधताना केंद्र सरकारवर जोरदार टीका केली. “शिक्षण व्यवस्थेतील सुधारणा मागणाऱ्या व्यक्तींना अटक करणे ही लोकशाही नव्हे, तर हुकूमशाहीची प्रवृत्ती आहे. विद्यार्थ्यांच्या भविष्यासाठी लढणाऱ्या सोनम वांगचुक यांच्या पाठीशी युवासेना ठामपणे उभी आहे,” असे त्यांनी स्पष्ट केले. या आंदोलनात युवासेना उपजिल्हाप्रमुख सचिन जाधव, गुहागर तालुका युवासेना प्रमुख निनाद नार्वेकर, गुहागर शहर युवासेना प्रमुख राज विखारे, शहर महिला संघटिका सारिका कनगुटकर यांच्यासह शिवसेना व युवासेनेचे तालुका आणि शहरातील पदाधिकारी, शाखाप्रमुख, विभागप्रमुख, महिला पदाधिकारी, शेकडो युवासैनिक, शिवसैनिक, विद्यार्थी आणि नागरिक मोठ्या संख्येने सहभागी झाले.
