गुहागर – गुहागरचे विद्यमान आमदार भास्कर जाधव यांनी आपल्या मूळ गावी तुरंबव येथे कुटुंबीय व सहकाऱ्यांसमवेत शेतीच्या कामात सहभाग घेत मातीशी असलेले आपले घट्ट नाते पुन्हा एकदा जपले. राजकारणातील व्यस्त दिनक्रमातून वेळ काढत ते दरवर्षी शेतीच्या कामात आवर्जून सहभागी होत असल्याचे यावेळीही पाहायला मिळाले.
शेतीच्या हंगामात आमदार जाधव सकाळपासून सायंकाळपर्यंत शेतातच विविध कामांमध्ये व्यस्त असतात. कुटुंबीय आणि सहकाऱ्यांसोबत खांद्याला खांदा लावून शेतीची कामे करताना ते कोणताही मोठेपणा न दाखवता सर्वांसोबत मिसळून काम करतात. दिवसभराच्या श्रमानंतर ते शेतातच सर्व सहकारी आणि कुटुंबीयांसमवेत साधेपणाने जेवणाचा आस्वाद घेतात.
यावेळी शेतातील वातावरण अधिक उत्साही करण्यासाठी कोकणातील पारंपरिक लोकगीतेही गुणगुणली जातात. श्रम, परंपरा आणि ग्रामीण संस्कृतीचा अनोखा संगम या शेतीच्या कामात अनुभवायला मिळतो. त्यामुळे शेतात एक प्रकारचे उत्सवी वातावरण निर्माण होते.
उच्च राजकीय पदावर कार्यरत असूनही शेतीबद्दलची आपुलकी कायम ठेवत आमदार भास्कर जाधव यांनी मातीतली नाळ जपली आहे. त्यांच्या या कृतीतून शेती, श्रमसंस्कृती आणि ग्रामीण परंपरांप्रती असलेला आदर अधोरेखित होत असून, समाजासमोर एक प्रेरणादायी आदर्श निर्माण होत आहे.
