गुहागर – गुहागर तालुक्यातील मुंदर-ओवळणवाडी परिसरात शुक्रवारी सकाळी मानवी हाडांचा सांगाडा आढळून आल्याने परिसरात एकच खळबळ उडाली. प्राथमिक तपासात हा सांगाडा मे महिन्यापासून बेपत्ता असलेल्या प्रमोद धोंडू कांबळे (वय ४५) यांचा असल्याची शक्यता व्यक्त करण्यात येत आहे.
प्रमोद कांबळे हे मे महिन्यापासून बेपत्ता होते. त्यांच्या नातेवाईकांनी तसेच मित्रपरिवाराने विविध ठिकाणी शोध घेतला होता. याबाबत गुहागर पोलीस ठाण्यात बेपत्ता झाल्याची नोंदही करण्यात आली होती. पोलिसांनीही शोधमोहीम राबविली होती, मात्र त्यांचा कोणताही ठावठिकाणा लागत नव्हता. दरम्यान, शुक्रवारी सकाळी ओळवणवाडी परिसरातील माळरानावर अळंबी शोधण्यासाठी गेलेल्या एका ग्रामस्थाला मानवी सांगाडा दिसून आला. त्यांनी तत्काळ गुहागर पोलिसांना माहिती दिली. माहिती मिळताच पोलीस घटनास्थळी दाखल झाले आणि पंचनामा करून सांगाडा ताब्यात घेतला.
घटनास्थळी सापडलेल्या कपड्यांच्या आधारे मृताची प्राथमिक ओळख प्रमोद धोंडू कांबळे अशी पटली. सांगाडा पुढील तपासासाठी आणि वैद्यकीय परीक्षणासाठी पाठविण्यात आला आहे.
स्थानिकांच्या माहितीनुसार, प्रमोद कांबळे यांना फिट्स (अपस्मार)चा त्रास होता. माळरानावर असताना अचानक झटका आल्याने त्यांचा मृत्यू झाला असावा, असा प्राथमिक अंदाज व्यक्त केला जात आहे. मात्र, मृत्यूचे नेमके कारण शवविच्छेदन अहवालानंतरच स्पष्ट होणार असल्याचे पोलिसांनी सांगितले. या घटनेमुळे कांबळे कुटुंबीयांसह संपूर्ण परिसरात हळहळ व्यक्त होत असून, गुहागर पोलिसांनी आकस्मिक मृत्यूची नोंद करून पुढील तपास सुरू केला आहे.
