गुहागर -महाराष्ट्र राज्य मार्ग परिवहन महामंडळाच्या (एसटी) ७८ व्या वर्धापन दिनानिमित्त मंगळवार, दि. १४ जुलै रोजी गुहागर एसटी आगार व बसस्थानक परिसरात भव्य वृक्षारोपण अभियान आयोजित करण्यात आले आहे. पर्यावरण संवर्धनाचा संदेश देत हरित महाराष्ट्राच्या संकल्पाला बळकटी देण्याच्या उद्देशाने हा उपक्रम राज्यभर राबविण्यात येत असून, मुंबई येथे परिवहन मंत्री प्रताप सरनाईक यांच्या हस्ते मुख्य कार्यक्रम होणार आहे.
एसटी महामंडळाने राज्यातील सर्व विभागांना परिपत्रक जारी करून प्रत्येक आगार, बसस्थानक आणि विभागीय कार्यालय परिसरात उपलब्ध जागेत स्थानिक हवामानास अनुरूप, स्थानिक प्रजातींची आणि दीर्घकाळ टिकणाऱ्या वृक्षांची लागवड करण्याच्या सूचना दिल्या आहेत. विशेषतः कुंपणालगतच्या मोकळ्या जागेचा वृक्षारोपणासाठी वापर करण्यावर भर देण्यात आला आहे.
गुहागर आगारात होणाऱ्या या कार्यक्रमाला आमदार भास्कर जाधव, गुहागर पंचायत समितीचे सभापती प्रणव पोळेकर, उपसभापती निलेश सुर्वे, तहसीलदार परीक्षित पाटील, लायन्स क्लबचे अध्यक्ष व सदस्य, गुहागर एसटी प्रवासी संघटनेचे पदाधिकारी तसेच स्थानिक प्रशासनातील अधिकारी उपस्थित राहणार आहेत. त्यांच्या हस्ते वृक्षारोपण करण्यात येणार असून, पर्यावरण संरक्षणाची सामूहिक शपथही घेतली जाणार आहे.
या अभियानात एसटी कर्मचारी, विविध सामाजिक संस्था, स्वयंसेवी संघटना, विद्यार्थी आणि नागरिकांनी मोठ्या संख्येने सहभागी व्हावे, असे आवाहन एसटी प्रशासनाकडून करण्यात आले आहे. वृक्षारोपणाबरोबरच वृक्षसंवर्धनाची जबाबदारी स्वीकारून पर्यावरण रक्षणासाठी सर्वांनी पुढाकार घ्यावा, असा संदेश या उपक्रमातून दिला जाणार आहे.
