चिपळूण -चिपळूण शहरातील भाजी मंडई परिसरात रविवारी सायंकाळी एक धक्कादायक घटना घडली. भाजी खरेदी करून परत निघालेल्या एका कारचालकाने वाहन रिव्हर्स घेताना अंदाज चुकल्याने कार थेट शिवनदीत कोसळली. सुदैवाने नदीतील पाण्याची पातळी कमी असल्याने आणि कार पलटी न झाल्याने मोठी जीवितहानी टळली.
चालकाने भाजी मंडईच्या मागील बाजूस वाहन उभे केले होते. खरेदी आटोपल्यानंतर रिव्हर्स घेत असताना वाहनावरील नियंत्रण सुटले आणि कार सरळ नदीपात्रात घसरली. ही घटना सायंकाळी सुमारे ७ वाजण्याच्या सुमारास घडल्याने परिसरात एकच खळबळ उडाली. घटनेची माहिती मिळताच स्थानिक नागरिकांनी तातडीने घटनास्थळी धाव घेतली. त्यानंतर क्रेनच्या सहाय्याने नदीत अडकलेली कार सुरक्षितपणे बाहेर काढण्यात आली. नदीतील चिखलामुळे कारचे मोठे नुकसान झाले असले तरी चालकाला कोणतीही गंभीर दुखापत झाली नाही.
या घटनेनंतर भाजी मंडई परिसरातील नदीकाठाजवळ आवश्यक सुरक्षाभिंत, संरक्षक कठडे आणि इशारा फलक उभारण्याची मागणी नागरिकांकडून पुन्हा जोर धरू लागली आहे. अशा निष्काळजीपणामुळे भविष्यात मोठी दुर्घटना घडू नये, यासाठी प्रशासनाने तातडीने उपाययोजना कराव्यात, अशी मागणी स्थानिकांकडून होत आहे.
