खेड – ऐन गणेशोत्सवात लोटे, आवाशी आणि घाणेखुंट परिसरातील पाणीपुरवठा तब्बल दोन दिवस खंडित झाल्याने गणेशभक्त आणि चाकरमान्यांची मोठी गैरसोय झाली. लोटे औद्योगिक वसाहतीत क्रेनच्या अपघातात एमआयडीसीची पिण्याच्या पाण्याची जलवाहिनी फुटल्याने हा पाणीपुरवठा खंडित झाला होता. अखेर शनिवार, दि. १९ सप्टेंबर रोजी दुपारनंतर एमआयडीसीच्या संबंधित विभागाने जलवाहिनीची दुरुस्ती पूर्ण करून पाणीपुरवठा सुरळीत केला.
लोटे औद्योगिक वसाहतीतील रिंकल केमिकल्स कारखान्यात काम सुरू होते. या कामाचा ठेका ‘सुयोग निर्मिती’ या ठेकेदार कंपनीला देण्यात आला होता. काम पूर्ण करून क्रेन कारखान्याच्या प्रवेशद्वारातून बाहेर येत असताना प्रवेशद्वारालगत असलेल्या गटारात ती कोसळली. यावेळी गटाराशेजारी असलेली एमआयडीसीची पिण्याच्या पाण्याची जलवाहिनी फुटली. जलवाहिनी फुटल्याने परिसरातील पाच ते सहा गावांचा पाणीपुरवठा बंद झाला. गणेशोत्सवाच्या काळातच ही घटना घडल्याने लोटे, आवाशी, घाणेखुंट परिसरातील नागरिक, गणेशभक्त तसेच बाहेरगावाहून आलेल्या चाकरमान्यांना पाण्याअभावी मोठ्या अडचणींचा सामना करावा लागला. घटनेची माहिती मिळताच एमआयडीसीचे अधिकारी घटनास्थळी दाखल झाले. त्यांनी पाहणी करून दुरुस्तीचे काम हाती घेतले. संबंधित ठेकेदार कंपनीने या घटनेची जबाबदारी स्वीकारत जलवाहिनी दुरुस्तीसाठी येणारा खर्च देण्याचे मान्य केले.
एमआयडीसीच्या माध्यमातून जलवाहिनीच्या दुरुस्तीचे काम पूर्ण करण्यात आले. पाणीपुरवठा पूर्ववत झाल्यानंतर नागरिकांनी सुटकेचा निःश्वास सोडला.
