गुहागर – महाराष्ट्र नवनिर्माण सेनेचे अध्यक्ष राज ठाकरे यांच्या वाढदिवसानिमित्त गुहागर तालुका मनसेच्या वतीने विद्यार्थी आणि नागरिकांसाठी भव्य वक्तृत्व स्पर्धेचे आयोजन करण्यात आले आहे. रविवार, १४ जून २०२६ रोजी दुपारी २ वाजता शृंगारतळी येथील मनसेच्या मध्यवर्ती संपर्क कार्यालयात ही स्पर्धा रंगणार असून, तालुक्यातील वक्तृत्वप्रेमींना आपली भाषणकला सादर करण्याची सुवर्णसंधी मिळणार आहे.
ही स्पर्धा तीन गटांमध्ये विभागण्यात आली असून, इयत्ता १ ली ते ४ थीच्या विद्यार्थ्यांसाठी ‘माझा महाराष्ट्र’ हा विषय देण्यात आला आहे. या गटासाठी ३ ते ४ मिनिटांचा कालावधी असेल. इयत्ता ५ वी ते १० वीच्या विद्यार्थ्यांसाठी ‘मला माहित असणारे राजसाहेब ठाकरे’ हा विषय निश्चित करण्यात आला असून, त्यांना ४ ते ५ मिनिटांचा वेळ दिला जाणार आहे. तर खुल्या गटासाठी ‘मराठी अस्मिता आणि माझी कर्तव्ये’ हा समकालीन विषय ठेवण्यात आला असून, सर्व वयोगटातील स्पर्धकांना सहभागी होता येणार आहे.
राज ठाकरे यांच्या वाढदिवसाचे औचित्य साधून आयोजित करण्यात आलेल्या या स्पर्धेमुळे विद्यार्थ्यांमध्ये वक्तृत्व कौशल्य, विचार मांडण्याची क्षमता आणि मराठी भाषेप्रती अभिमान जागृत होण्यास मदत होणार असल्याचे आयोजकांनी सांगितले.
स्पर्धेत सहभागी होण्यासाठी इच्छुकांनी राहूल जाधव (८९७५३४८१२), प्रशांत साटले (९९६७०८८५१९), प्रथमेश रायकर (९३७०५०७८९९) किंवा वेदांत देवळेकर (९६६५८७०६९४) यांच्याशी संपर्क साधून नाव नोंदणी करावी, असे आवाहन मनसे गुहागर तालुका शाखेच्या वतीने करण्यात आले आहे.
