महाबळेश्वर – महाबळेश्वर बसस्थानकावर बस उशिरा सुटल्याने प्रवाशांनी विचारणा केली आणि त्यानंतर अधिकाऱ्याचा संयम सुटला आणि त्यातून निर्माण झालेल्या वादाचे पडसाद थेट एसटी महामंडळाच्या कारवाईपर्यंत पोहोचले. बस नियोजित वेळेपेक्षा उशिरा का सुटत आहे, याची विचारणा काही प्रवाशांनी केली. यावेळी उपस्थित नागरिक आणि पत्रकार संपूर्ण प्रकाराचे चित्रीकरण करत होते.
प्रवाशांच्या प्रश्नांमुळे आणि सुरू असलेल्या व्हिडिओ चित्रीकरणामुळे स्थानिक प्रशासनातील संबंधित अधिकाऱ्यांची चांगलीच कोंडी झाल्याचे दिसून आले. याच दरम्यान महाबळेश्वर आगारातील वाहतूक निरीक्षक शाहरुख खान आणि पत्रकार यांच्यात शाब्दिक वाद झाला. आरोपानुसार, वादाच्या भरात त्यांनी पत्रकार बांधवांविषयी आक्षेपार्ह व अपमानास्पद शब्दांचा वापर केला. या घटनेतच सर्वच पत्रकारांनी निषेध केला संबंधित एसटी अधिकाऱ्याविरुद्ध वरिष्ठ स्तरावर तो व्हिडिओ पाठवला. एसटी महामंडळाने या प्रकरणाची गंभीर दखल घेतली. पत्रकार व प्रवाशांशी गैरवर्तन केल्याचा ठपका ठेवत वाहतूक निरीक्षक शाहरुख खान यांना तात्काळ निलंबित करण्यात आले आहे.या बाबत सातारा विभाग नियंत्रक कार्यालयाने प्रसिद्धीस दिलेल्या पत्रकात, संबंधित प्रकार निंदनीय असल्याचे नमूद करत सर्व अधिकारी व कर्मचाऱ्यांना प्रवासी आणि पत्रकारांशी सौजन्यपूर्ण व जबाबदारीने वागण्याच्या स्पष्ट सूचना देण्यात आल्याचे म्हटले आहे.
प्रवाशांना सेवा देण्यासाठी असलेल्या यंत्रणेकडूनच जर प्रश्न विचारणाऱ्यांना अपमानास्पद वागणूक मिळत असेल, तर ते लोकशाही व्यवस्थेसाठी चिंताजनक असल्याची प्रतिक्रिया नागरिकांमधून व्यक्त होत आहे. या घटनेमुळे सार्वजनिक सेवेत उत्तरदायित्व, शिस्त आणि संवादाचे महत्त्व पुन्हा एकदा अधोरेखित झाले आहे.
