रामपूर – शासनाच्या घरकुल योजनेचा लाभ मिळवण्यासाठी खोटा उत्पन्नाचा दाखला सादर केल्याचा गंभीर प्रकार चिपळूण तालुक्यात उघडकीस आला आहे. विशेष म्हणजे हा प्रकार एका माजी ग्रामपंचायत कर्मचाऱ्याकडूनच घडल्याचे समोर आल्याने प्रशासनात खळबळ उडाली आहे. याप्रकरणी मार्गताम्हाणे खुर्द येथील रहिवासी व ग्रामपंचायतीचा माजी शिपाई मानसिंग श्रीपत चव्हाण याच्याविरुद्ध चिपळूण पोलीस ठाण्यात फसवणुकीचा गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी मानसिंग चव्हाण हा मार्गताम्हाणे खुर्द ग्रामपंचायतीत शिपाई म्हणून कार्यरत होता. प्रधानमंत्री आवास योजना (ग्रामीण) अंतर्गत घरकुल मंजूर करून घेण्यासाठी त्याने स्वतःचे उत्पन्न प्रत्यक्षापेक्षा कमी दाखवणारा बनावट दाखला सादर केला. आर्थिक वर्ष २०२१-२२ मध्ये त्याचे वास्तविक उत्पन्न १ लाख ४७ हजार १०९ रुपये असताना, केवळ ६० हजार रुपये उत्पन्न असल्याचे दाखवण्यात आले होते.
या कथित बनावट दाखल्याच्या आधारे त्याने शासनाच्या घरकुल योजनेचा लाभ घेत घर बांधून घेतल्याचे तपासात निष्पन्न झाले. लाभार्थी पात्र नसतानाही शासकीय निधीचा लाभ घेतल्यामुळे शासनाची आर्थिक फसवणूक झाल्याचा ठपका त्याच्यावर ठेवण्यात आला आहे.
मार्गताम्हाणे खुर्द ग्रामपंचायतीचे अधिकारी मनोहर शंकर गायकवाड यांनी यासंदर्भात पोलिसांत तक्रार दिल्यानंतर गुन्हा दाखल करण्यात आला. शासकीय योजनेचा लाभ मिळवण्यासाठी बनावट कागदपत्रांचा वापर झाल्याचा आरोप असल्याने या प्रकरणाकडे गंभीरतेने पाहिले जात आहे. शासकीय योजनांमधील गैरप्रकारांना आळा घालण्यासाठी प्रशासनाने सुरू केलेल्या पडताळणी मोहिमेत हा प्रकार उघडकीस आल्याचे समजते. प्रकरणाचा पुढील तपास चिपळूण पोलीस करत आहेत.
