खेड – खेड शहराजवळील जगबुडी नदीच्या डोहात बुधवारी दुपारी घडलेल्या दुर्दैवी दुर्घटनेत तीन युवकांचा बुडून मृत्यू झाला, तर एका युवकाला स्थानिकांच्या धाडसी प्रयत्नांमुळे जीवदान मिळाले. या हृदयद्रावक घटनेमुळे खेड शहर आणि परिसरात शोककळा पसरली आहे.
दुर्दैवीरित्या मृत्यू पावलेले हे युवक मूळचे सांगली जिल्ह्यातील पण अनेक वर्षांपासून मुंबईतील कुर्ला येथे वास्तव्यास होते. उन्हाळी सुट्टीसाठी ते खेड तालुक्यातील नातेवाईकांकडे आले होते. सुट्टीचा आनंद लुटण्यासाठी बुधवारी दुपारी चौघेजण जगबुडी नदीच्या डोहात पोहण्यासाठी गेले होते.
नदीतील पाण्याची खोली आणि डोहाचा अंदाज न आल्याने चौघेही खोल पाण्याकडे ओढले गेले. जीव वाचवण्यासाठी त्यांनी केलेल्या आर्त हाकांमुळे परिसरातील नागरिक घटनास्थळी धावून आले. स्थानिकांनी तत्काळ बचावकार्य सुरू केले आणि एका युवकाला सुखरूप बाहेर काढण्यात यश मिळवले. मात्र उर्वरित तिघे पाण्यात बेपत्ता झाले. घटनेची माहिती मिळताच पोलीस, महसूल प्रशासन आणि स्थानिक बचाव पथक घटनास्थळी दाखल झाले. शोधमोहीम राबविल्यानंतर तिघांचे मृतदेह बाहेर काढण्यात आले. पंचनामा करून मृतदेह शवविच्छेदनासाठी पाठविण्यात आले असून पोलिसांकडून पुढील तपास सुरू आहे. सुट्टी घालवण्यासाठी आनंदाने नातेवाईकांकडे आलेल्या तिघा युवकांचा काही क्षणांत मृत्यू झाल्याने त्यांच्या कुटुंबीयांवर दुःखाचा डोंगर कोसळला आहे. जगबुडी नदीतील धोकादायक डोहांबाबत पुन्हा एकदा प्रश्नचिन्ह उपस्थित झाले असून नागरिकांनी अशा ठिकाणी पोहताना अत्यंत सावधगिरी बाळगण्याची गरज व्यक्त केली जात आहे.
