खेड – खेड तालुक्यातील आंबडस येथे ग्रामसभेनंतर झालेल्या वादातून हाणामारीची घटना घडली असून या प्रकरणी आठ जणांविरोधात खेड पोलीस ठाण्यात गुन्हा दाखल करण्यात आला आहे. या मारहाणीत एका व्यक्तीस गंभीर दुखापत झाल्याची माहिती पोलिसांनी दिली.
५ जून रोजी आंबडस ग्रामपंचायत कार्यालयात ग्रामसभा सुरू असताना काही ग्रामस्थ बाहेर पडले. त्यावेळी दोन गटांमध्ये शाब्दिक वाद निर्माण झाला. वाद वाढत जाऊन त्याचे रूपांतर हाणामारीत झाले.या घटनेत अमोल अशोक खेडेकर (वय ३२) व संतोष विठ्ठल करंजकर यांना स्टीलच्या रॉडने तसेच हातापायांनी मारहाण करण्यात आल्याचा आरोप आहे. मारहाणीत अमोल खेडेकर यांना गंभीर दुखापत झाली. दरम्यान, वाद सोडविण्यासाठी घटनास्थळी आलेले अनिल खेडेकर, आदिती खेडेकर आणि अशोक खेडेकर यांनाही शिवीगाळ करून धक्काबुक्की व मारहाण करण्यात आल्याचे तक्रारीत नमूद करण्यात आले आहे. या प्रकरणी तुकाराम करंजकर, रोहित करंजकर, संदेश खताते, संदीप करंजकर, विशेष करंजकर, चंद्रकांत करंजकर, संजय करंजकर आणि दिनेश करंजकर या आठ जणांविरोधात गुन्हा दाखल करण्यात आला असून पुढील तपास खेड पोलीस करीत आहेत. ग्रामसभेनंतर घडलेल्या या प्रकारामुळे आंबडस गावात तणावाचे वातावरण निर्माण झाले असून परिसरात या घटनेची चर्चा सुरू आहे.
