चिपळूण – राज्याच्या अन्न व औषध प्रशासन विभागाची धुरा स्वीकारल्यानंतर आयएएस अधिकारी तुकाराम मुंढे यांनी भेसळयुक्त व प्रतिबंधित अन्नपदार्थांविरोधात कठोर भूमिका घेतल्याची चर्चा राज्यभर सुरू असतानाच चिपळूणमध्ये प्रतिबंधित गुटखा साठवणूक व विक्रीप्रकरणी मोठी कारवाई करण्यात आली आहे. या प्रकरणी प्रवीण बांदेकर यांच्याविरुद्ध चिपळूण पोलीस ठाण्यात गुन्हा दाखल करण्यात आला आहे.
आरोपीकडे मानवी आरोग्यास घातक ठरणारे प्रतिबंधित गुटखा व तत्सम अन्नपदार्थ साठवून त्यांची विक्री आणि वाहतूक केली जात असल्याची माहिती संबंधित यंत्रणेला मिळाली होती. त्यानुसार करण्यात आलेल्या कारवाईत मोठ्या प्रमाणात प्रतिबंधित पदार्थ जप्त करण्यात आले.अन्न सुरक्षा व मानके कायदा २००६ अंतर्गत राज्यात गुटखा व तत्सम पदार्थांवर बंदी असताना त्यांची बेकायदेशीर विक्री सुरू असल्याचे समोर आले. या पार्श्वभूमीवर अन्न व औषध प्रशासन विभाग आणि पोलिसांच्या संयुक्त कारवाईमुळे गुटखा विक्रेत्यांमध्ये खळबळ उडाली आहे. विशेष म्हणजे, अन्न व औषध प्रशासन विभागाचा कार्यभार तुकाराम मुंढे यांनी स्वीकारल्यानंतर राज्यभर प्रतिबंधित पदार्थांविरोधातील कारवाया अधिक तीव्र होणार असल्याची चर्चा सुरू आहे. चिपळूणमधील ही कारवाई त्याच मोहिमेचा भाग असल्याचे बोलले जात असून, नियम मोडणाऱ्यांवर यापुढे अधिक कठोर कारवाई होण्याची शक्यता व्यक्त केली जात आहे. या प्रकरणी विविध कायद्यांतील तरतुदींनुसार गुन्हा नोंद करण्यात आला असून पुढील तपास पोलीस उपनिरीक्षक महनुगे चव्हाण करीत आहेत. या कारवाई मध्ये किती लाखाचा गुटखा सापडला.? याची माहिती अद्याप उघड करण्यात आलेली नाही तपास झाल्यानंतर ती माहिती उघड करण्यात येईल असे समजते.
