मंडणगड – रत्नागिरी जिल्ह्यातील मंडणगड तालुक्यातील कोंडगाव येथे चारित्र्याच्या संशयातून पतीने पत्नीची हत्या केल्याची धक्कादायक घटना घडली आहे. या घटनेमुळे परिसरात खळबळ उडाली असून नागरिकांमध्ये हळहळ व्यक्त होत आहे.
कोंडगाव येथील मंगेश निलेश पवार याला पत्नी वैशाली मंगेश पवार हिच्याबाबत संशय होता. या कारणावरून दोघांमध्ये वारंवार वाद होत असल्याचे समोर आले आहे. शनिवारी दुपारच्या सुमारास पुन्हा एकदा त्यांच्यात वाद झाला. वादाचे रूपांतर हिंसक घटनेत होत आरोपीने धारदार कोयत्याने पत्नीवर हल्ला केला. घरासमोरील जागेत झालेल्या या हल्ल्यात वैशाली गंभीर जखमी झाली. डोक्यावर झालेल्या गंभीर वारांमुळे तिचा जागीच मृत्यू झाला. घटनेची माहिती मिळताच मंडणगड पोलिसांनी घटनास्थळी धाव घेत पाहणी व पंचनामा केला. या प्रकरणी रामभाऊ सखाराम पवार यांनी दिलेल्या फिर्यादीवरून मंगेश पवार याच्याविरुद्ध खुनाचा गुन्हा दाखल करण्यात आला आहे. पोलिसांनी आरोपीला ताब्यात घेतले असून घटनेमागील नेमके कारण आणि इतर बाबींचा तपास सुरू आहे.
अत्यंत दुर्दैवी आणि मन हेलावून टाकणाऱ्या या घटनेमुळे कोंडगावसह संपूर्ण मंडणगड तालुक्यात शोककळा पसरली आहे. तसेच कौटुंबिक वाद आणि संशयाच्या भावनेतून घडणाऱ्या गुन्ह्यांबाबत पुन्हा एकदा चिंता व्यक्त केली जात आहे.
