चिपळूण – कायदा व सुव्यवस्थेची जबाबदारी सांभाळतानाच पर्यावरण संवर्धनाची जाणीव जपणाऱ्या चिपळूण पोलिसांनी जागतिक पर्यावरण दिनानिमित्त एक प्रेरणादायी उपक्रम राबविला. चिपळूण पोलीस ठाण्याच्या आवारात पारिजात वृक्षाचे रोप लावून पर्यावरण संरक्षणाचा संदेश देण्यात आला. पोलीस निरीक्षक फुलचंद मेंगडे यांच्या हस्ते वृक्षारोपण करण्यात आले. यावेळी पोलीस अधिकारी, कर्मचारी व अंमलदार उपस्थित होते.
वाढते प्रदूषण, कमी होत चाललेले हरित क्षेत्र आणि बदलत्या हवामानाच्या पार्श्वभूमीवर वृक्षसंवर्धनाची गरज अधोरेखित करण्यात आली.
यावेळी मार्गदर्शन करताना मेंगडे यांनी प्रत्येक नागरिकाने केवळ झाडे लावण्यापुरते न थांबता त्यांचे संगोपन करण्याची जबाबदारीही स्वीकारावी, असे आवाहन केले. “पर्यावरणाचे रक्षण ही काळाची गरज असून भावी पिढ्यांसाठी हिरवागार वारसा निर्माण करणे आपले कर्तव्य आहे,” असे त्यांनी सांगितले.
धार्मिक, सांस्कृतिक आणि औषधी गुणधर्मांसाठी ओळखल्या जाणाऱ्या पारिजात वृक्षाची निवड करून चिपळूण पोलिसांनी पर्यावरण संवर्धनासोबतच निसर्गाशी असलेले नाते अधिक दृढ करण्याचा संदेश दिला. या उपक्रमामुळे पोलीस ठाण्याचा परिसर अधिक हिरवागार होणार असून नागरिकांकडूनही या उपक्रमाचे स्वागत व कौतुक करण्यात येत आहे.
