चिपळूण – रत्नागिरी जिल्ह्यातील कामथे येथील शासकीय ग्रामीण रुग्णालयात कार्यरत असलेल्या महिला वैद्यकीय अधिकाऱ्याला लाचलुचपत प्रतिबंधक विभागाने (ACB) लाच स्वीकारताना रंगेहाथ पकडल्याने आरोग्य विभागात एकच खळबळ उडाली आहे.
मिळालेल्या माहितीनुसार, रुग्णाला विशिष्ट औषधांचा पुरवठा करण्यासाठी संबंधित डॉक्टरांनी तक्रारदाराकडे 4 हजार 500 रुपयांची मागणी केली होती. याबाबत तक्रारदाराने लाचलुचपत प्रतिबंधक विभागाकडे धाव घेतली. तक्रारीची पडताळणी केल्यानंतर ACB च्या अधिकाऱ्यांनी सापळा रचून कारवाई केली.
बुधवारी सायंकाळी सुमारे 7 ते 7.30 वाजण्याच्या दरम्यान तक्रारदाराकडून लाचेची रक्कम स्वीकारताना महिला वैद्यकीय अधिकारी डॉ. कांचन मदार यांना ACBच्या पथकाने रंगेहाथ ताब्यात घेतले. या कारवाईनंतर संबंधित डॉक्टरांविरोधात भ्रष्टाचार प्रतिबंधक कायद्यानुसार गुन्हा दाखल करण्याची प्रक्रिया सुरू करण्यात आली आहे. तसेच लाचेची मागणी कोणत्या कारणासाठी करण्यात आली होती आणि या प्रकरणात आणखी कोणाचा सहभाग आहे का, याचा तपास सुरू आहे.
सरकारी आरोग्य सेवेत कार्यरत असलेल्या डॉक्टरवर झालेल्या या कारवाईमुळे परिसरात चर्चेला उधाण आले असून नागरिकांकडून संताप व्यक्त केला जात आहे. या प्रकरणाबाबत अधिकृत माहिती ACBकडून पुढील तपासानंतर जाहीर केली जाणार आहे.
