खेड – खेड तालुक्यातील खेड – भरणे मार्गावर शनिवारी सायंकाळी झालेल्या भीषण अपघाताने परिसरात हळहळ व्यक्त होत आहे. भरधाव वेगाने धावणाऱ्या डंपरने रिक्षाला पाठीमागून जोरदार धडक दिल्याने एका व्यक्तीचा जागीच मृत्यू झाला, तर रिक्षाचालक गंभीर जखमी झाला आहे.
भिलारे आयणी येथील संतोष भिलारे हे त्यांच्या मालकीची रिक्षा घेऊन भरणेहून खेडकडे जात होते. आठवडा बाजार परिसरात रिक्षा पोहोचताच मागून भरधाव आलेल्या डंपरने जोरदार धडक दिली. धडकेचा जोर इतका प्रचंड होता की रिक्षेचा मागील भाग अक्षरशः चेंदामेंदा झाला. या अपघातात रिक्षामधील किंवा रिक्षाजवळ असलेल्या एका व्यक्तीचा जागीच मृत्यू झाला. मात्र, मृत व्यक्तीची ओळख अद्याप पटलेली नसून तो रिक्षेतील प्रवासी होता की रिक्षात बसण्यासाठी थांबलेला होता, याबाबत संभ्रम कायम आहे. यासंदर्भात पोलिसांकडून सखोल तपास सुरू आहे.अपघातानंतर घटनास्थळी नागरिकांनी मोठी गर्दी केली. स्थानिकांच्या मदतीने जखमी संतोष भिलारे यांना तातडीने उपचारासाठी रुग्णालयात दाखल करण्यात आले. दरम्यान, १०८ रुग्णवाहिका सेवा आणि खेड पोलिसांनी तत्काळ घटनास्थळी धाव घेत मदतकार्य राबवले.या अपघातामुळे काही काळ भरणे-खेड मार्गावरील वाहतूक ठप्प झाली होती.
