गुहागर – गुहागर तालुक्यातील मळण येथे बांधकामाच्या कामादरम्यान घडलेल्या दुर्दैवी अपघातात एका तरुण कामगाराचा मृत्यू झाल्याने परिसरात हळहळ व्यक्त होत आहे.
खामशेत पाष्टेवाडी येथील नरेश पाष्टे हे मळण येथील दिलीप आगरे यांच्या नव्या घराच्या बांधकामावर काम करत होते. बुधवारी सकाळी सुमारे १० वाजण्याच्या सुमारास ते पडवीच्या भिंतीवर चढून लोखंडी अँगलच्या पोलाचे मोजमाप घेत होते. मात्र अचानक तोल गेल्याने ते घराशेजारील कोरड्या वहाळात कोसळले. यावेळी भिंतीचे चिरे त्यांच्या अंगावर पडल्याने ते गंभीर जखमी झाले.
घटनेनंतर ग्रामस्थांनी व सहकाऱ्यांनी तातडीने त्यांना दवाखान्यात दाखल केले. मात्र डॉक्टरांनी तपासून त्यांना मृत घोषित केले. एका मेहनती तरुणाचा अशा दुर्दैवी अपघातात मृत्यू झाल्याने कुटुंबीयांवर दुःखाचा डोंगर कोसळला आहे. परिसरातही शोककळा पसरली असून हळहळ व्यक्त केली जात आहे. या प्रकरणी गुहागर पोलीस ठाण्यात भादवि कलम १९४ अंतर्गत आकस्मिक मृत्यूची नोंद करण्यात आली आहे. घटनेचा पुढील तपास पोलीस उपनिरीक्षक संदीप भोपळे करीत आहेत.
