गुहागर – गुहागर पोलीस ठाण्यात गेली दोन वर्षे उल्लेखनीय सेवा बजावणारे पोलीस उपनिरीक्षक संदीप भोपळे यांना सहायक पोलीस निरीक्षकपदी बढती मिळाली असून त्यांची रायगड जिल्ह्यात बदली करण्यात आली आहे. त्यांच्या बढतीमुळे पोलीस दलासह सर्वसामान्य नागरिकांतून आनंद व्यक्त केला जात आहे.
सन २०१४ मध्ये पोलीस सेवेत दाखल झाल्यानंतर त्यांनी गडचिरोली, पालघर, रत्नागिरी मध्ये विविध ठिकाणी जबाबदारी सांभाळली. प्रत्येक ठिकाणी आपल्या धाडसी कार्यशैली, तपासातील बारकावे आणि जनतेशी जिव्हाळ्याचे संबंध यामुळे त्यांनी स्वतंत्र ओळख निर्माण केली. गुहागरमध्ये कार्यरत असताना अनेक गुन्ह्यांचा छडा लावण्यात त्यांचा मोलाचा वाटा राहिला. गुन्हे उघडकीस आणण्याची अचूक पद्धत, कायदा-सुव्यवस्था अबाधित ठेवण्यासाठी घेतलेली तत्पर भूमिका आणि नागरिकांशी साधलेला संवाद यामुळे ते सर्वसामान्यांमध्ये लोकप्रिय ठरले. कडक शिस्त आणि माणुसकीचा समतोल राखणारे अधिकारी म्हणून संदीप भोपळे यांचे नाव पोलीस दलात आदराने घेतले जाते. त्यांच्या पुढील वाटचालीसाठी सर्व स्तरांतून शुभेच्छांचा वर्षाव होत आहे.
