चिपळूण – चिपळूण शहरातील एका नामांकित बँकेतील अधिकारी मुकुंद मुरलीधर पालांडे यांच्या संशयास्पद मृत्यूमुळे शहरात खळबळ उडाली आहे. गेल्या तीन दिवसांपासून बेपत्ता असलेल्या मुकुंद यांचा मृतदेह अखेर कोळकेवाडी धरण परिसरात पाण्यात आढळून आला. या घटनेमुळे परिसरात हळहळ व्यक्त होत आहे.
मुकुंद पालांडे बेपत्ता होण्यापूर्वी त्यांनी चार पानी चिठ्ठी लिहून ठेवल्याचे समोर आले आहे. त्यानंतर ते कोळकेवाडी धरण परिसरात गेल्याचा अंदाज व्यक्त करण्यात आला. धरणाजवळ त्यांची दुचाकी आढळून आल्यानंतर नातेवाईकांनी तातडीने पोलिसांकडे धाव घेतली. त्यानंतर पोलिस व NDRF पथकाकडून शोधमोहीम राबविण्यात आली. रविवारी सायंकाळी त्यांचा मृतदेह पाण्यात तरंगताना आढळून आला.या प्रकरणी शिरगाव पोलिसांनी चिठ्ठीच्या आधारे सहा जणांविरोधात गुन्हा दाखल केला आहे. खंडणीची मागणी, मानसिक व शारीरिक छळ तसेच आत्महत्येस प्रवृत्त केल्याचे आरोप करण्यात आले आहेत.
पोलिसांनी तत्काळ कारवाई करत अनोखी खेडेकर, अखिलेश खेडेकर, योगेश मोरे आणि वेदांत टाकले या चौघांना अटक केली आहे. न्यायालयाने त्यांना एक दिवसांची पोलीस कोठडी सुनावली असून अन्य दोन संशयित आरोपींचा शोध सुरू आहे.
या घटनेचे गांभीर्य लक्षात घेऊन अप्पर पोलीस अधीक्षक बी. बी. महामुनी यांनी चिपळूण येथे भेट दिली. पोलीस अधीक्षक नितीन बगाटे, उपविभागीय पोलीस अधिकारी प्रकाश बेले यांच्या मार्गदर्शनाखाली सहाय्यक पोलीस निरीक्षक भरत पाटील पुढील तपास करत आहेत. दरम्यान, शोकाकुल वातावरणात मुकुंद पालांडे यांच्यावर अंत्यसंस्कार करण्यात आले. एका तरुण अधिकाऱ्याच्या दुर्दैवी मृत्यूमुळे चिपळूण शहरात हळहळ व्यक्त होत आहे.
