खेड -मुंबई-गोवा राष्ट्रीय महामार्ग क्र. ६६ वर कशेडी बोगदा ते चिपळूण दरम्यान अवजड वाहनांची बेकायदेशीर पार्किंग दिवसेंदिवस गंभीर समस्या बनत चालली आहे. महामार्गाच्या कडेला तासन्तास उभी राहणारी ट्रक आणि कंटेनर वाहने यामुळे वाहतुकीला मोठा अडथळा निर्माण होत असून अपघातांचे प्रमाणही चिंताजनकरीत्या वाढले आहे.
या महामार्गावरील भरणे नाका येथील पुलाखाली करण्यात आलेल्या अवैध पार्किंगमुळे वाहनचालकांना मार्ग काढताना मोठी कसरत करावी लागत आहे. रात्रीच्या वेळी या ठिकाणी अपघाताचा धोका अधिक वाढत असून स्थानिक नागरिक आणि वाहनचालकांमधून तीव्र संताप व्यक्त केला जात आहे. या गंभीर परिस्थितीची दखल घेत भारतीय जनता पार्टी च्या पदाधिकाऱ्यांनी खेडचे पोलीस निरीक्षक विवेक आयरे यांची भेट घेत तातडीने कारवाई करण्याची मागणी केली. महामार्गावरील अवैध पार्किंग हटवून वाहतूक सुरळीत करावी, अन्यथा भविष्यात मोठी जीवितहानी होण्याची शक्यता असल्याचा इशाराही यावेळी देण्यात आला. यावेळी भाजपा नेते तथा खेड नगर परिषदेचे माजी नगराध्यक्ष वैभव खेडेकर, भाजपा खेड शहराध्यक्ष भालचंद्र साळवी, भाजपा अल्पसंख्यांक रत्नागिरी जिल्हाध्यक्ष तथा नगरसेवक गटनेते रहिम सहिबोल, भाजपा युवा मोर्चा रत्नागिरी जिल्हा सरचिटणीस मिलिंद नांदगांवकर यांच्यासह अन्य पदाधिकारी उपस्थित होते.
