गुहागर -शृंगारतळी पोलीस चौकीसमोरून सकाळी सुमारे आठ वाजता दुचाकी चोरीला गेल्याने खळबळ उडाली. चोरी लक्षात आल्यानंतर दुचाकी मालकाने स्वतः ग्रामपंचायतीचे सीसीटीव्ही फुटेज तपासले. फुटेजच्या आधारे संशयिताचा माग काढून त्याला पकडल्याची माहिती आहे.
चोरीची दुचाकी जानवळे रोडवरील एका भंगार व्यावसायिकाला अवघ्या १ हजार ७०० रुपयांना विकल्याची माहिती समोर आली आहे. त्यामुळे दुचाकी खरेदी करताना वाहनाची आरसी, मालकी हक्काची कागदपत्रे, वाहन क्रमांक व विक्रेत्याची ओळख तपासली होती का, असा प्रश्न उपस्थित झाला आहे. या व्यवहाराची पोलिसांनी सखोल चौकशी करून संबंधित भंगार व्यावसायिकाची भूमिका तपासावी, तसेच यापूर्वी चोरीला गेलेल्या दुचाकींपैकी काही वाहने अशाच पद्धतीने भंगारात विकली गेली आहेत का, याचाही तपास करावा, अशी मागणी नागरिकांकडून होत आहे.दरम्यान, पोलीस चौकीसमोरूनच दुचाकी चोरीला जाणे आणि वाहनमालकाने स्वतः सीसीटीव्ही तपासून संशयिताचा शोध घेणे, यामुळे शृंगारतळीतील वाहन सुरक्षेचा प्रश्न पुन्हा ऐरणीवर आला आहे.
