गुहागर -देश स्वातंत्र्याची ७८ वर्षे पूर्ण करून विकासाच्या नव्या पर्वात पोहोचला असताना गुहागर विधानसभा मतदारसंघातील पाचेरीसडा गावातील खोत वठार आणि ब्राह्मणवाडी परिसरातील ग्रामस्थ मात्र आजही मूलभूत रस्त्याच्या प्रतीक्षेत आहेत. घरापर्यंत जाण्यासाठी धड रस्ता नाही आणि काही वर्षांपूर्वी उभारलेला लोखंडी साकवही आता जीर्ण झाल्याने ग्रामस्थांचा प्रवास अक्षरशः जीवघेणा बनला आहे.
पाचेरीसडा परिसरातील नागरिकांना दैनंदिन ये-जा करण्यासाठी या जीर्ण साकवाचा आधार घ्यावा लागतो. साकवाची अवस्था धोकादायक झाल्याने लहान मुले, महिला, ज्येष्ठ नागरिक आणि आजारी व्यक्तींना घेऊन जाणे म्हणजे जीव धोक्यात घालण्यासारखे झाले आहे. पावसाळ्यात तर ग्रामस्थांच्या अडचणी अनेक पटींनी वाढतात गावाशेजारील नदीला पूर आला की ये-जा करण्याचे मार्ग बंद होतात. काही वेळा परिस्थिती इतकी गंभीर होते की पाचेरीसडा परिसराचा बाहेरील जगाशी संपर्कच तुटतो. अशा वेळी एखाद्या रुग्णाला तातडीने उपचारासाठी नेण्याची वेळ आली तर कुटुंबीयांसमोर मोठे संकट उभे राहते. रुग्णाला वाहनातून नेणे शक्य नसल्याने डोलीचा आधार घेण्याची वेळ ग्रामस्थांवर येते. आज गावागावात रस्ते, पूल आणि मूलभूत सुविधांच्या विकासाच्या घोषणा केल्या जात आहेत. ग्रामीण भागातील नागरिकांना सुविधा देण्याचे आश्वासन दिले जाते. मात्र पाचेरीसड्यातील नागरिकांना साधा रस्ता मिळत नसेल तर विकासाच्या या घोषणा नेमक्या कोणासाठी? असा संतप्त सवाल ग्रामस्थांकडून उपस्थित केला जात आहे. एकीकडे शहरांमधून गावाकडे परतण्याचे, गावाकडे रोजगार आणि उद्योग उभारण्याचे आवाहन केले जाते. मुंबई-पुण्यात स्थायिक झालेल्या कुटुंबांनी पुन्हा गावाकडे यावे, अशी अपेक्षा व्यक्त केली जाते. मात्र गावात पोहोचण्यासाठीच रस्ता नसेल, तर ‘रिव्हर्स मायग्रेशन’ होणार तरी कसे? असा सवाल स्थानिक नागरिक करत आहेत.
