गुहागर – गुहागर तालुक्यातील शृंगारतळी बाजारपेठ परिसरात मांस वाहतूक करणारा एक ट्रक आढळून आल्याने काही काळ तणावाचे वातावरण निर्माण झाले. पेट्रोल पंप परिसरात उभ्या असलेल्या या ट्रकमधून रक्त गळत असल्याचे स्थानिक नागरिकांच्या निदर्शनास आले. त्यानंतर नागरिकांनी ट्रकची पाहणी केली असता त्यामध्ये मोठ्या प्रमाणात मांस असल्याचे आढळून आले.
ट्रकमधील मांस नेमके कोणत्या प्राण्याचे आहे, याबाबत अद्याप अधिकृत माहिती समोर आलेली नाही. मात्र, हे मांस गोवंशाचे असल्याची शक्यता काही स्थानिक नागरिकांनी व्यक्त केली. त्यामुळे या घटनेची माहिती परिसरात पसरल्यानंतर नागरिकांमध्ये चर्चा आणि संतापाचे वातावरण निर्माण झाले.या प्रकरणाची सखोल चौकशी करून ट्रकमधील मांसाचा नेमका प्रकार स्पष्ट करावा, अशी मागणी करत काही नागरिकांनी गुहागर पोलीस ठाण्यात धाव घेतली. यावेळी संबंधित वाहनाची तपासणी करून मांसाबाबत आवश्यक ती कायदेशीर प्रक्रिया करावी, अशी मागणी करण्यात आली. दरम्यान, पोलिसांनी या घटनेची दखल घेत तपास सुरू केला असून मांसाचे नमुने तपासणीसाठी पाठविण्यात येणार असल्याची माहिती आहे. अधिकृत तपासणीचा अहवाल प्राप्त झाल्यानंतरच मांस कोणत्या प्राण्याचे आहे, हे स्पष्ट होणार आहे.
