बारामती – पैशांचा पाऊस पाडून श्रीमंत करून देतो” असे आमिष दाखवत महिलांची फसवणूक आणि अत्याचार करणाऱ्या भोंदूबाबाला बारामती न्यायालयाने दोषी ठरवत कठोर शिक्षा सुनावली आहे.
मिलिंद मदन जाधव (वय 50, रा. गुहागर, जि. रत्नागिरी) याने बारामती परिसरातील महिलांना जादूटोण्याच्या नावाखाली फसवले. अघोरी पूजेच्या बहाण्याने त्यांच्याकडून मोठी रक्कम उकळण्यात आली तसेच चुकीच्या पद्धतीने विधी करून शारीरिक अत्याचार करण्यात आल्याचे तपासात उघड झाले. या प्रकरणी जिल्हा न्यायाधीश एस. आर. पाटील यांनी जाधव याला जादूटोणा प्रतिबंधक कायद्यांतर्गत 4 वर्षे सक्तमजुरी आणि 10 हजार रुपयांचा दंड, तसेच फसवणुकीच्या गुन्ह्यात 2 वर्षांची शिक्षा आणि 5 हजार रुपयांचा दंड अशी शिक्षा सुनावली. पीडित महिलांनी बारामती तालुका पोलीस ठाण्यात तक्रार दिल्यानंतर पोलिसांनी गुन्हा दाखल करून तपास सुरू केला. पोलीस उपनिरीक्षक धनश्री भगत यांनी तपास करत न्यायालयात ठोस पुरावे सादर केले. सरकारी वकील अॅड. ज्ञानदेव शिंगाडे यांनी सात साक्षीदार तपासले. सर्व पुरावे आणि युक्तिवाद ऐकल्यानंतर न्यायालयाने आरोपीला दोषी ठरवले. या घटनेमुळे परिसरात खळबळ उडाली होती. दरम्यान, गुहागर-चिपळूण परिसरातही अशा प्रकारांची शक्यता व्यक्त होत असून नागरिकांनी पुढे येऊन तक्रारी देण्याचे आवाहन करण्यात येत आहे.
