गुहागर – गुहागर–चिपळूण मार्गावरील चिखली येथील स्वामी समर्थ मठाजवळ भीषण अपघात झाला असून, या दुर्घटनेत एका युवकाचा जागीच मृत्यू झाला तर त्याचा सहकारी गंभीर जखमी झाला आहे.
मिळालेल्या माहितीनुसार, पवारसाखरी येथील ओम शीतप आणि प्रतीक भुवड हे दोघे मित्र दुचाकीवरून चिपळूणकडे जात होते. त्याचवेळी मळण येथील आयरिश रिक्षा ही स्वामी समर्थ मठाजवळ प्रवाशाला सोडून शृंगारतळीच्या दिशेने परत निघाली होती याच वेळी
दुचाकी आणि आयरिश रिक्षा यांच्यात जोरदार धडक झाली. या भीषण अपघातात ओम शीतप यांचा जागीच मृत्यू झाला असून प्रतीक भुवड गंभीर जखमी झाला आहे. जखमी युवकाला तातडीने उपचारासाठी रुग्णालयात दाखल करण्यात आले आहे.
घटनेची माहिती मिळताच स्थानिक नागरिक व गुहागरचे पोलीस निरीक्षक सचिन सावंत, तसेच पोलीस उपनिरीक्षक भोपाळे आपल्या पथकासह तात्काळ घटनास्थळी दाखल झाले. त्यांनी परिसराची पाहणी करून वाहतूक सुरळीत करण्यासाठी उपाययोजना केल्या तसेच जखमी युवकाला तातडीने रुग्णालयात हलविण्यास मदत केली.
या प्रकरणी पोलीसांकडून पुढील तपास सुरू असून अपघाताचे नेमके कारण शोधण्याचे काम सुरू आहे.
