चिपळूण – चिपळूण तालुक्यातील गाणे-खडपोली परिसरात एक धक्कादायक घटना उघडकीस आली असून वणव्यात होरपळून एका ७० वर्षीय महिलेचा मृत्यू झाल्याने परिसरात खळबळ उडाली आहे. तारा वाघे असे मृत महिलेचे नाव आहे.
२७ मार्चपासून तारा वाघे या बेपत्ता होत्या. त्यांच्या शोधासाठी नातेवाईकांकडून प्रयत्न सुरू होते. याचवेळी गाणे-खडपोली परिसरात लागलेल्या वणव्यानंतर जळालेल्या अवस्थेत एका महिलेचा मृतदेह आढळून आला. तपासाअंती हा मृतदेह तारा वाघे यांचाच असल्याचे निष्पन्न झाले. वणव्याच्या तीव्रतेमुळे त्या होरपळून मृत्यूमुखी पडल्याचा प्राथमिक अंदाज व्यक्त करण्यात येत आहे. या घटनेमुळे परिसरात भीतीचे वातावरण निर्माण झाले आहे. घटनेची माहिती मिळताच अलोरे-शिरगाव पोलीस ठाण्याचे पोलीस घटनास्थळी दाखल झाले असून पंचनामा व पुढील तपास सुरू आहे. मृत्यू नेमका कशामुळे झाला याचा अधिक तपास पोलीस करत आहेत. या घटनेमुळे वणव्याच्या वाढत्या घटनांबाबत चिंता व्यक्त केली जात असून नागरिकांनी अधिक सतर्क राहण्याचे आवाहन करण्यात येत आहे.
