चिपळूण- चिपळूण तालुक्यातील रामपूर येथील आवटेवाडी
परिसरात आंब्याच्या बागेजवळ दरीत जळालेल्या अवस्थेत मानवी अवशेष आढळून आल्याने परिसरात खळबळ उडाली होती. या प्रकरणाचा वेगाने तपास करत चिपळूण पोलिसांनी खुनाचा गुन्हा उघडकीस आणत दोन संशयित आरोपींना अटक केली असून त्यात मुंबई येथील महिलेचाही समावेश आहे. तर एजाज कुरेशी (वय 54, रा. मुंबई) असे खून झालेल्या व्यक्तीचे नाव आहे.
पोलीस निरीक्षक फुलचंद मेंगडे यांनी आज पत्रकार परिषद घेऊन या खून प्रकरणाची सविस्तर माहिती दिली. दि. २८ मार्च २०२६ रोजी सकाळी सुमारे ११ वाजता रामपूर येथील डॉ. रावराणे यांनी पोलिसांना माहिती दिली की, त्यांच्या आंब्याच्या बागेच्या पूर्वेस सुमारे ७० मीटर अंतरावर दरीतील झाडीमध्ये काहीतरी संशयास्पद जळाल्याचे दिसत आहे तसेच त्या ठिकाणी लहान आकाराची हाडे विखुरलेली आहेत. या माहितीवरून उपविभागीय पोलीस अधिकारी प्रकाश बेले, पोलीस निरीक्षक फुलचंद मेंगडे व पोलिसांनी तात्काळ घटनास्थळी धाव घेतली.
घटनास्थळी पाहणी केली असता जळालेल्या अवस्थेत हाडांचे तुकडे, अंगठी, रिंग व इतर साहित्य आढळून आले. यानंतर अधिक पोलीस फौजफाटा व चिपळूण येथील फॉरेन्सिक पथकाला घटनास्थळी बोलावण्यात आले. वरिष्ठ अधिकाऱ्यांच्या मार्गदर्शनाखाली पंचनामा करून सर्व साहित्य जप्त करण्यात आले. जप्त केलेल्या हाडांच्या तुकड्यांची तपासणी कामथे रुग्णालयातील वैद्यकीय अधिकाऱ्यांकडून करण्यात आली. त्यावेळी ही हाडे मानवी असण्याची शक्यता नाकारता येत नसल्याचे प्राथमिक मत देण्यात आले. त्यामुळे हा घातपाताचा प्रकार असल्याचा संशय अधिक बळावला. त्या नंतर जिल्हा पोलीस अधीक्षक नितीन बगाटे, अपर पोलीस अधीक्षक महामुनी यांचे मार्गदर्शन घेतले.
व गोपनीय माहितीच्या आधारे तपास करताना घटनास्थळाची जागा विशाल विजय खोडदेकर (वय २८, रा. रामपूर) याच्या मालकीची असल्याचे समोर आले. तसेच तो चार महिने पसार असल्याची माहिती मिळाली. याच दरम्यान मालाड पोलिसदेखील त्याच्या शोधात चिपळूणमध्ये आल्याचे उघड झाले. त्यामळे त्याच्यावर संशय अधिक बळावला. पुरावा नष्ट करण्यासाठी डिझेल ओतून ते अवशेष जाळल्याची माहिती खोडदेकर याने पोलिसांना दिली. दरम्यान, या दोन्ही संशयित आरोपीना पोलिसांनी अटक केली असून दोन्ही आरोपींना न्यायालयाने ६ एप्रिल २०२६ पर्यंत पोलीस कोठडी सुनावली आहे.
हा गंभीर गुन्हा जिल्हा पोलीस अधीक्षक नितीन बगाटे, अपर पोलीस अधीक्षक महामुनी व उपविभागीय पोलीस अधिकारी प्रकाश बेले यांच्या मार्गदर्शनाखाली उघडकीस आणण्यात आला असून पुढील तपास सुरू असल्याची माहिती पोलीस निरीक्षक फुलचंद मेंगडे यांनी दिली. दरम्यान अवघ्या काही तासांत चिपळूण पोलिसांनी खुनाचा छडा लावल्याने पोलीस प्रशासनाचे कौतुक होत आहे.
