गुहागर – रत्नागिरी जिल्ह्यात अवैध शस्त्रांवर कारवाईचा बडगा उगारत स्थानिक गुन्हे अन्वेषण शाखेने गुहागर तालुक्यात एका इसमाला बेकायदा शस्त्रांसह रंगेहाथ अटक केली. वेलदूर येथील संजय श्रीधर फनगुसकर या आरोपीला अटक करण्यात आले आहे. त्याच्याकडून बंदूक, गावठी कट्टा आणि जिवंत काडतुसे असा घातक साठा जप्त करण्यात आला आहे.
रत्नागिरी जिल्हा पोलीस अधीक्षक नितीन दत्तात्रय बगाटे व अपर पोलीस अधीक्षक बी. बी. महामुनी यांनी जिल्ह्यातील अवैध शस्त्रे व त्यांचा वापर रोखण्यासाठी कठोर कारवाई करण्याच्या सूचना दिल्या होत्या. त्या अनुषंगाने स्थानिक गुन्हे अन्वेषण शाखेचे पोलीस निरीक्षक नितीन ढेरे यांच्या मार्गदर्शनाखाली एक पथक गुहागर पोलीस ठाण्याच्या हद्दीत गस्त घालत होते. यावेळी गुहागर-शृंगारतळी मार्गावर मोटारसायकलवरून संशयास्पद हालचाली करणारा संजय फनगुसकर हा शस्त्रे घेऊन जात असल्याची माहिती पोलिसांना मिळाली. पोलिसांनी त्याला ताब्यात घेऊन झडती घेतली असता त्याच्याकडे एक सिंगल बॅरल बंदूक, एक गावठी कट्टा व ८ जिवंत काडतुसे आढळून आली. या कारवाईत शस्त्रे तसेच गुन्ह्यात वापरलेली दुचाकी असा एकूण १ लाख ६० हजार ८०० रुपयांचा मुद्देमाल पोलिसांनी जप्त केला. याप्रकरणी गुहागर पोलीस ठाण्यात गुन्हा दाखल करण्यात आला आहे. ही कारवाई पोलीस उपनिरीक्षक प्रशांत बोरकर, विनायक राजवैद्य, प्रवीण खांबे, गणेश सावंत , अतुल कांबळे यांच्या पथकाने केली. दरम्यान, आरोपीने ही शस्त्रे कोठून आणली व त्यांचा वापर कशासाठी केला जाणार होता, याचा पुढील तपास गुहागर पोलीस करत आहेत.
