संगमेश्वर – न्यू इंग्लिश हायस्कूल कसबा संगमेश्वर च्या दहावी बॅच २००१ मधील सर्व विद्यार्थ्यांचा स्नेह मेळावा प्रशालेमध्ये अतिशय उत्साहामध्ये नुकताच पार पडला.
या कार्यक्रमास निमंत्रित प्रशालेचे माजी शिक्षक यांनी आपले मनोगत व्यक्त करत माजी विद्यार्थ्यांना पुढील वाटचाली करता शुभेच्छा दिल्या. तसेच प्रशालेचे माजी प्राचार्य मणेर यांनी प्रत्यक्ष कार्यक्रमास उपस्थित न राहता आल्यामुळे त्यांनी व्हाट्सअप मेसेज द्वारे आपल्या शुभेच्छा व्यक्त केल्या. सदर कार्यक्रमास प्रशालेचे विद्यमान प्राचार्य एच जी शेख, पर्यवेक्षक पटेल ,गावडे ,पडवळ ,मोहिते व संस्थेचे शिपाई सुरज गीते उपस्थित होते. यावेळी शेख सरांच्या हस्ते दीप प्रज्वलन करून कार्यक्रमास सुरुवात करण्यात आली यानंतर शिक्षकांनी आपले मनोगत व्यक्त करताना माजी विद्यार्थ्यांकडून होत असणाऱ्या सहकार्याने प्रशालेतील विद्यार्थ्यांना उपयोगी असणाऱ्या क्रीडा साहित्याची खरेदी करून संस्थेचा क्रीडा आलेख उंचावत आहे अशी माहिती दिली. तर बागवे यांनी माजी विद्यार्थ्यांच्या मुलांना स्पर्धा परीक्षांमध्ये गणित या विषयाशी मैत्री व्हावी म्हणून स्वतः लिहिलेल्या स्पर्धा परीक्षा गणित या पुस्तकाच्या प्रती भेट म्हणून दिल्या, तर माधुरी यांनी आपले मनोगत व्यक्त करताना विद्यार्थ्यांना एक छान गीत सादर करत स्वरमय शुभेच्छा दिल्या. सदर कार्यक्रमांमध्ये विद्यार्थ्यांमधून स्नेहा पवार, आशिष बल्लाळ, मोहसीन बोट,सागर सुर्वे,नम्रता शेवडे, नूतन मोरे, ज्ञानदा जोशी, श्रद्धा इंदुलकर,महेश जाधव,योगेश मोहिते व प्रवीण जाधव यांनी देखील आपले मनोगत व्यक्त करून प्रशालेविषयी आपली कृतज्ञता व्यक्त केली. सदर कार्यक्रमास परदेशात काम करत असणारे माजी विद्यार्थी उपस्थित राहू शकत नसल्याने त्यांनी दृकश्राव्य प्रणाली द्वारे कार्यक्रमाचा आनंद घेतला व आपले मनोगत व्यक्त केले.सदर कार्यक्रमास रंजीता बेंडके,अक्सा खान,उपेंद्र रहाटे ,अविनाश रहाटे, संदेश गानु, मुफिद मुजावर, धीरज साळवी, मझहर बागवान,विनोद पटेल, जितेंद्र बामणे, प्रमोद चिले हे देखील स्वतःचा अमूल्य वेळ काढून उपस्थित राहिले. सदर कार्यक्रमाची आठवण म्हणून निसर्गप्रेमी आशिष बल्लाळ यांच्या संकल्पनेतून शाळेमध्ये फुलझाडाचे वृक्षारोपण करण्यात आले तसेच बॅच २००१ कडून शाळेला भेटवस्तू म्हणून साऊंड सिस्टम प्रदान करण्यात आली. प्रशालेमधील सर्व दिवंगत शिक्षक व बॅच २००१ मधील माजी विद्यार्थी यांना श्रद्धांजली वाहत व योगेश मोहिते यांच्या सुमधुर बासरी वादनाने कार्यक्रमाचा समारोप करण्यात आला.सदर कार्यक्रमाचे उत्तम सूत्रसंचालन माजी विद्यार्थ्यांमधून प्राध्यापक डॉक्टर प्रवीण जाधव तसेच प्रशाले कडून गावडे यांनी करत कार्यक्रमाची शोभा वाढवली.
